Popular Bible Verses from Romans 5

Share

Ngim impailan Apudyus chi amod un ayatla kan chitaku, ti si hachiʼn malagbyasuɏ taku pay laing latoy si Kristu para kan chitaku.

Ked ha awed lamlamala kan Apudyus achipun machismaya, ti amod chi ayat Apudyus kan chitaku, ya illidchola Ispiritula ta inggew kan chitaku.

Chakampun un abus cha hachi gumalasan taku, ngim ulay lu mapampaligatan taku, ti ammu taku un cha ligat ked peɏoswaola alus. Ta lu maalusan taku ligat, peɏoswaola bibiɏuʼn ugali un umalamong kan Apudyus, ked ha bibiɏuʼn ugali peɏoswaola lamlama.

Gapu ta ibilang chitaku kan Apudyus lalintog gapu si pammati taku kan Kristu, laidchen taku si lin-awa un makatimpuyug kan Apudyus gapu si killingwan Apu takuʼn Jesu Kristu. Ked gapu bo si pammati taku, mipati taku si kachegun Apudyus un liliklaon taku si sala. Ya gumalas taku gapu ta lamlamaon takuʼn mipati si michayawan Apudyus!

Ti hachi ustuʼn timpu un pililiyan Apudyus un lappun pay laing kabyeeɏan taku, latoy si Kristu gapu kan chitaku un malagbyasuɏ.

Ked gapu si latoyala, imbilang Apudyus chitaku lalintog. Ked sigulachuʼn taguwola chitaku si sangan Apudyus un malusa kan cha losan un tagu.

Ked gapu si achipun chi ossaan un tagu un si Adam tummungpaɏan kan Apudyus, lisapasap un malagbyasuɏ cha losan un tagu. Ngim gapu bo si tummungpaɏan chi osaʼn tagu un si Jesu Kristu, makwa un mibilang cha losan un tagu lalintog kan Apudyus.

Ngim chakampun un abus cha hachi, ti tuttuwaʼn pilagalas Apudyus chitaku gapu si killingwan Apu Jesu Kristu un siya langwa si lakabibiɏulan taku kan Apudyus.