Popular Bible Verses from Luke 3

Share

Si osaʼn eɏgew sakbyey un mibyaɏud si John, bilunyagela cha achun tagu, bilunyagela bo si Jesus. Lagamput pun, lalluwalu si Jesus ot liwalit ud langit. Ot ha Ispiritun Apudyus lan-osog ot lallap-oy kan siya un isun chi kalapati. Ot ladngeɏ ginga un lampeɏpuʼd langit un kalala, “Sika Alakkuʼn tagtagopok ya masmas-omak.”

Ngim kalan John kan chicha, chakampun un sakon si Kristu. “Awed chi misagsagulud un langatngatu lu sakon, ked achipulak lumbong un mangukas si sancheɏla. Bunyagek chikayu si chelum, ngim siya bunyagela chikayu si Ispiritun Apudyus ya apuy.

Masapuɏʼn koonyu cha losan un mangipaila un tuttuwaʼn lambyabyawi kayu kan cha byasbyasuɏyu. Achiyu kalan un, gapu ta galak chikayu kan Abraham, milisiyu kachusaanyu kan Apudyus. Lappun katuttuwaan chi hachi. Ibyegak kan chikayu un makwaʼn mambyalilon Apudyus cha byetuʼn alla si galak Abraham.

Si Apudyus isun chi taguʼn iyaallala wasaylaʼn mamokpok si puun chi kayu. Losan un kayuʼn achipun mamunga si bibiɏu, ked mapokpok ya mitungu si apuy.”

Katchi matungpaɏan chi liigili si libluʼn Isaiah un propeta si awi, un kalala, “Inggew chi osaʼn tagu si lugeɏʼn lappun ummili un langibyegbyega kan cha tagu, ‘Allaʼn gumatong chi Apu. Pabiɏuwonyu somsomokyu ya mansagala kayu un isun chi ileɏamyu chaɏan un ayon chi Ari. Masapuɏʼn abyabonyu cha losan un uɏuk ta matalap losan un tagudtud ya bilig. Palinchongonyu cha pikkupikku un kesa ya taliptipanyu, ta losan un tagu itullongcha malaguwan Apudyus kan chicha.’ ”