Popular Bible Verses from LUCAS 3

Share

Ket naaramid, nga idi nabautizaran dagiti amin a tattao, ni Jesus nabautizaran met, ket idi nga agcarcararag, ti langit naglucat, Ket bimmaba kencuana ti Espiritu Santo a nasimbubukel a cas la calapati, ket nangngeg ti maysa a timec ti langit: Sica ti Anacco a dungdungoen, maayayoac unay kenca

Simmungbat ni Juan a kinunana cadacuada amin: Siac, kinapudnoanna, bautizarancayo iti danum; ngem umayto ti sabali nga adadda ti pannacabalinna agem siac, isu a diac maicari a mangwarwar iti galut ti zapatosna: isu bautizarannacayto iti Espiritu Santo ken ti apuy

Agaramidcay ngarud ti bungbunga, a maicari iti panagbabawi, ket dicay agpanunot a cunaenyo: Adda ni Abraham a pannacaamami: ta cunac cadacayo a ti Dios mabalinna ti mamatacder cadagitoy a batbato ti annac ken Abraham.

Ket itatta met laeng ti wasay naisaaden iti ramut dagiti caycayo: amin a cayo ngarud, a saan nga agbunga ti nasayaat mapucan, ket maisungrod iti apuy.

Cas adda a naisurat iti libro dagiti sasao ni mammadto nga Isaias a cunana: Timec ti maysa nga agaw-awag iti let-ang: Isaganayo ti dalan ti Apo, Palintegenyo dagiti danana. Amin a baet ti banbantay mapnonto, ket maipababanto amin a bantay ken turod, ket ti nakil-lo malintegto, ket dagiti dalan a dakes mapalanasdanto. Ket ti amin a lasag makitananto ti panangisalacan ti Dios.