Popular Bible Verses from DEUTERONOMIO 28

Share

“Kag kon magpamati ka sing makugihon sa tingug sang GINOO nga imo Dios, sa pagbantay sa paghimo sang tanan niya nga sogo nga ginasogo ko sini nga adlaw sa imo, ang GINOO nga imo Dios magapataas sa imo labaw sa tanan nga pungsud sang duta.

Kag magaabut sa imo ini tanan nga pagpakamaayo kag magalambut sa imo, kon magpamati ka sa tingug sang GINOO nga imo Dios.

Kag ang GINOO magahimo sa imo nga olo, kag indi ikog; kag didto ka lamang sa ibabaw, kag indi ka sa idalum; kon magpamati ka sang mga sogo sang GINOO nga imo Dios, nga ginasogo ko sa imo sini nga adlaw, sa pagbantay kag sa paghimo sa ila

Buksan sang GINOO nga sa imo ang iya maayo nga bahandi sang mga langit, sa paghatag sang ulan sang imo duta sa iya panag-on kag sa pagpakamaayo sang tanan nga binuhatan sang imo kamut; kag ikaw magapahulam sa madamu nga mga pungsud, apang ikaw indi magpanghulam.

“Ipadaug sang GINOO ang imo mga kaaway nga nagatindug batok sa imo sa atubangan mo; magagolowa sila batok sa imo sa isa ka dalan, kag magapalagyo sila sa atubangan mo sa pito ka dalan.

Sogoon sang GINOO ang pagpakamaayo sa imo sa imo tambobo, kag sa tanan nga buhaton sang imo kamut; kag sia magapakamaayo sa imo sa duta nga ginahatag sa imo sang GINOO nga imo Dios.

Pinakamaayo ang imo pagsulud, kag pinakamaayo ang imo paggowa.

Pinakamaayo ka sa banwa, kag pinakamaayo ka sa uma.

Pinakamaayo ang bunga sang imo lawas, kag ang bunga sang imo duta, kag ang bunga sang imo mga sapat, ang tinubo sang imo kahayupan, kag ang mga tinday sang imo panong.

Ang GINOO magapalig-on sa imo nga katawohan nga balaan sa iya, sono sa ginsumpa niya sa imo, kon magbantay ka sang mga sogo sang GINOO nga imo Dios, kag maglakat sa iya mga dalanon.

Pinakamaayo ang imo alat kag ang imo lamasan.

Kag ang GINOO magapabugana sa imo sa kaayohan, sa bunga sang imo lawas, kag sa bunga sang imo kahayupan, kag sa bunga sang imo duta, sa duta nga ginsumpa sang GINOO sa imo mga ginikanan nga ihatag sa imo.

Kag ang tanan nga mga katawohan sang duta makakita nga ikaw gintawag sa ngalan sang GINOO; kag kahadlukan ka nila.

kag indi maglipas sa bisan ano nga mga polong nga ginasogo ko sa imo sini nga adlaw, sa too ukon sa wala, sa pagsonod sang iban nga mga dios sa pag-alagad sa ila.

“Apang kon indi ka magpamati sa tingug sang GINOO nga imo Dios sa pagbantay sa paghimo sang tanan niya nga sogo kag sang iya mga palatukuran nga ginasogo ko sini nga adlaw sa imo, niyan ini tanan nga pagpakamalaut magaabut sa imo kag magalambut sa imo.