Popular Bible Verses from ISAIAS 60

Share

Tindog, sidlak; kay ang imong kahayag miabot na, ug ang himaya sa GINOO misubang nganha kanimo.

Ug ang kanasoran moduol sa imong kahayag, ug ang mga hari nganha sa kasilaw sa imong pagsubang.

Kay tan-awa, ang kangitngit motabon sa yuta ug ang baga nga kangitngit sa mga katawhan; apan ang GINOO mosidlak nganha kanimo, ug ang iyang himaya makita sa ibabaw nimo.

Ang labing ubos mahimong usa ka banay, ug ang labing gamay mahimo nga usa ka gamhanang nasod; ako mao ang GINOO; diha sa panahon niini dalion nako kini.

Ang adlaw dili na mao ang imong kahayag panahon sa adlaw, o ingon nga kahayag modan-ag ang bulan kanimo sa gabii; apan ang GINOO mao ang imong kahayag nga walay kataposan, ug ang imong Dios mao ang imong himaya.

Ang imong adlaw dili na mosalop, o ang imong bulan moawop, kay ang GINOO mao ang imong kahayag nga walay kataposan, ug ang mga adlaw sa imong pagbangutan taposon.

Unya ikaw makakita ug mosidlak, ang imong kasingkasing matingala ug malipay; tungod kay ang kadagaya sa dagat dad-on nganha kanimo, ang bahandi sa mga nasod modangat kanimo.

Ilingi ang imong mga mata sa palibot, ug tan-aw; silang tanan nagtigom, sila nanganha kanimo; ang imong mga anak nga lalaki manganha kanimo gikan sa layo, ug ang imong mga anak nga babaye dad-on nga sinapwang sa mga bukton.

Ang imong katawhan mahimong matarong; sila makapanag-iya sa yuta hangtod sa kahangtoran, ang salingsing sa akong tinanom, ang buhat sa akong mga kamot, aron ako himayaon.

Ang kabangis dili na madungog diha sa imong yuta, ang kadaot o kalaglagan sulod sa imong mga utlanan; apan tawgon nimo ang imong mga kuta nga Kaluwasan, ug ang imong mga ganghaan Pagdayeg.

Ang imong mga ganghaan ablihan sa kanunay; sa adlaw ug sa gabii kini dili tak-opan, aron ang mga tawo maghatod kanimo sa bahandi sa kanasoran, uban sa ilang mga hari nga nangulo sa panon.

Ang panon sa mga kamilyo motabon kanimo, ang mga batan-on nga kamilyo sa Midian ug sa Epha; ang tanang gikan sa Seba manganhi. Sila magdala ug bulawan ug insenso, ug magmantala sa pagdayeg sa GINOO.

Ang mga langyaw magtukod sa imong mga kuta, ug ang ilang mga hari mag-alagad kanimo; kay diha sa akong kaligutgot gisamaran ko ikaw, apan tungod sa akong maayong kabubut-on gikaluy-an ko ikaw.

Bisan ug ikaw gisalikway ug gikasilagan, nga walay bisan usa nga mohapit kanimo, himoon ko ikaw nga halangdon hangtod sa kahangtoran, kalipay sa daghang mga kaliwatan.

Ikaw magsuso sa gatas sa mga nasod, ikaw magsuso sa dughan sa mga hari; ug ikaw makaila nga ako, ang GINOO, mao ang imong Manluluwas, ug imong Manunubos, ang Gamhanan ni Jacob.