Popular Bible Verses from Baroma 8

Share

Khwaamanya khuri mu biindu byoosi, Wele akholela buulayi abo babamukana; abo beesi niye alaanga khuulondekhana ni shitsilililwa sheewe.

Lwekhuuba ise ishiŋaŋasa ndi mbaawo shishiindu shishinyala shakhwawukhanisa ifwe khu khukana khwa Yesu ta. Abe ikhaba khuufwa, namwe buulamu, namwe bamalayika, namwe be buwuli, namwe bibiindu byoosi bibiiliwo ari, namwe bibiindu bibiliitsa mu moni, namwe bayiinga, sibilikhwawukhanisa ta. Namwe oba tsingoongo, namwe kamatila, namwe shishiindu shoosi mu byabuumbibwa, mbaawo na shitweela shishinyalisa khukhwawukhanisa ifwe khu khukana khweesi Wele aakhukanamo ifwe khuubirira mu Mukasya weefwe Kristo Yesu ta.

Ni musaambo niyo indweela, Umwoyo akhuyeeta ifwe mu butoro bweefwe. Khubweefwe fwenyene, sikhwaamanya nga ni khwaakha khwaaloomba ta. Ne Umwoyo umweene ekontselela ni khuutsiinikha khukhukhalomekha ta, mu lisiina lyeefwe.

Mu khulolelela bino byoosi, kane khulome khuri shiina? Noola Wele ali khu lubeka lweefwe, ne ndi naanu unakhusoolanisa ifwe?

Ari abo babaali atweela ni Kristo Yesu, mbaawo khukhwikiitsibwa ta.

Khuumalila kamakyesi koosi khu biindu bye kumubili khureera khuufwa. Ne khuura bibyambaaso khu biindu by'Omwoyo, khureera buulamu ni lukoosi.

Mu biindu bino byoosi ifwe khwaamala khaale khuuwula, khulwa Yesu uyo uwakhukana ifwe!

Ise nambaasa ndi khuutaambisibwa khukhuuliwo ari, sikhunyala khwalekhaanisibwa na khafwiiti khu shiriifwa shishiitsa khukhwokesebwa ifwe ta.

Ari naanu ndi unyala wakhwawukhanisa ifwe khu khukana khweesi Kristo aakhukanamo ifwe? Bukosi, namwe bihangafu, namwe khuukubyeengebwa, namwe intsala, namwe butaambi, namwe bukosi bwe khuufwa, namwe khuufwa?

Ni Wele, uwofwasa kimyoyo kye babaandu, wamanya sheesi Umwoyo aba alikho ambaasa. Khulwekhuuba Umwoyo aba alikho ekontselela nga Wele n'akana, nga aloombela bakhosefu.

Abo boosi beesi Umwoyo wa Wele araangilila bali babaana ba Wele.

Khulwekhuuba abo babamenya nga kumubili ni kukana bara bibyambaaso byaabwe khu biindu byeesi kumubili kukana. Ne abo babaamenya nga Umwoyo n'akana, bara bibyambaaso byaabwe khu biindu byeesi Umwoyo akana.

Wele s'aloba khuuwaanayo Umwaana weewe umweene ta, ne aamuwaanayo khulweefwe fweesi. N'endi Wele anyala aryeena waloba khukhuwa ifwe bibiindu byoosi atweela n'Umwaana weewe?

Umwoyo uwa Wele umweene etubaasa ni kimyoyo kyeefwe, waboola ari khuli babaana ba Wele. Ni khuba nga khuli babaana, khuba khuli basikha; basikha ba Wele, naluundi khuba khuli be busikha atweela ni Kristo, khukhwamila khu khutaambisibwa atweela ni naye, nio nafwe khufune shiriifwa atweela ni naye.

Bibyambaaso bibiiba khu biindu bye kumubili biba bikhaandisana ni Wele; sibiwulila kamakaambila ka Wele ta. Ilala sibinyala na khafwiiti byawulila Wele ta.

Khulwekhuuba bibuumbe byoosi byaloleelela, naluundi byaliindiilila lukali khubona nga Wele ni okesa lubuula babaana beewe.

Khulwekhuuba khwaamanya khuri khukhwoolisa ari, bibuumbe byoosi bikholatsaka shiisa, nga bitsiinikhanila atweela khukhwoolisa ana ari.