Popular Bible Verses from Gwøg 1

Share

De wu óyïddi ki tegø keny-ɑ óbëën Wëykwërø kömi wun; o wu óbëëd wu bɑ cwɑ̈ggɑ kì Yerusɑlem, kí Yeudiyɑ̀ bëne, kí Sɑmɑriyɑ̀ gïti wɑ̈thi tùngi piny.”

Kɑ gï köbbe kinni, “Kɑ̈gi piny, kí bøli keny-ɑ gwøøg jɑmmì bënn ying-ɑ cingi Wïy, ge pɑ dwɑddi kinni o ge bëëd ge ngɑ̈nyi yi wun.

O kɑ̈ng-ɑ ɑ́bëëde ki gïn, gï ɑ́cege kinni, “Wu ko dhwödh kì Yerusɑlem, de yïd wun møg-ɑ ɑ́kwøb yi Wïy kinni ómuuje; o møgɑni ɑ́lïngi yi wun kì yïɑ. Ji ɑ́jwɑ̈ɑ̈g yi Jøn kɑ pï kidyër, de kì bɑng cyɑ̈ng mø nøg, ji ójwɑ̈ɑ̈g yi wun kɑ Wëykwërø.”

Kì bɑng kɑ ɑ́thøwe, ree nyi nyudhe’ gïn, e onëënø, kì ri ngïjjì mø ngenyø, o kì yethi cyɑ̈ng pyɑ̈r ɑ́ngwen ɑ́bëëd e nyii cwöbø kì bøli gen, e kømm-ɑ kwøbbi Pödhi Jwøk.

Kɑ ɑ́rume kwøbi møgɑni, ge nudd ge nenn-ɑ yïe, ɑtïngii mɑl, kɑ gëng yi pøølø.

Ge ɑ́nudd ge nenn-ɑ mɑl, kun-ɑ ɑ́kedhe; ɑcwöb jøg ɑ́ryew mø ri gen di ógudh mø tɑr ge ócungø kì buti gen, kɑ ge köbbi yi jøgɑni ryeet kinni, “Wun ɑ jø Gɑlelì, wude ɑ nudd wu nenn-ɑ mɑl? Yëso, en ɑ ngɑn-ɑ ɑ́kɑ̈l kì kelli wun, e kïdh-ɑ mɑl, ódwöög ni kɑ ɑ́lidhii yi wun, e kedh-ɑ mɑl.”