Popular Bible Verses from Lucas 14

Share

Mi añ majqui mi' tsajcañon mach bʌ añic mi' ts'a'len i tat, i ña', i yijñam, i yalobilob, i yerañob, yic'ot i cuxtʌlel ja'el, mach mejlic ti ochel ti xcʌnt'añ c cha'añ.

Jiñi mach bʌ añic mi' ch'ʌm i cruz che' mi tsajcañon, mach mejlic ti ochel ti xcʌnt'añ c cha'añ.

Majqui jach chañ mi' mel i bʌ mi caj i peq'uesʌntel; jiñi pec' bʌ mi' mel i bʌ mi caj i chañ-esʌntel.

Che' ja'el, mi añ juntiquil mach bʌ yomic i len cʌy pejtelel i chu'bʌañ, mach mejlic ti ochel ti xcʌnt'añ c cha'añ.

¿Majqui ti la tojlel yom bʌ i mel chañ bʌ q'ueloñib, mach ba ñaxañic mi' buchtʌl i tsicben i tojol cha'añ mi' ña'tan mi jasʌl i taq'uiñ cha'añ mi' yujtel i mel? Mi tsi' melbe i c'ʌclib pero mi ma'añic tsa' mejli i yujtesan, mi caj i wajleñob pejtelel mu' bʌ i q'uelob. Mi caj i yʌlob: “Ili wiñic tsa' caji i wa'chocon chañ bʌ q'ueloñib, pero ma'añic tsa' mejli i yujtesan”.

Che' ma' mel q'uiñijel, pʌyʌ tilel jiñi mach bʌ añobic i chu'bʌañ, yic'ot mach bʌ weñobic i yoc i c'ʌb, yic'ot xpots'ob. Mi caj a taj i tijicñʌyel a pusic'al come mach mejlic i cha' q'uextʌbeñet, pero mi caj a q'uextʌbentel che' mi' cha' ch'ojyelob jiñi tojo' bʌ, —che'en Jesús.

Uts'at jiñi ats'am, pero mi tsa' jili i tsajel, ¿bajche' mi caj i cha' tsaj-esʌntel? Ma'añix i c'ʌjñibal cha'añ lum, mi cha'añic mi' xʌbob yic'ot i ta' alʌc'ʌl; mux i chojquel loq'uel. Jiñi am bʌ i chiquin cha'añ mi' yu'bin, la' i yu'bin.