Popular Bible Verses from Иоанница бицараб Рохалил хабар 10

Share

Цӏогьор вачӏунаро – бикъизе, чӏвазе, хвезабизе гурони. Дун вачӏун вуго гӏумру кьезе, гьарзаяб гӏумру кьезе.

Дун вуго лъикӏав вехь. Лъикӏав вехьас чахъабазе гӏоло рухӏги кьола.

Дир чахъабазда дир гьаракь рагӏула, дида гьелги лъала ва гьел дида хадурги рачӏуна.

Дица гьезие абадияб гӏумруги кьола. Гьел абадул абадиялъго хвезе гьечӏо ва лъиданиги кӏвеларо гьел дида кодоса рахъизе.

Дун вуго нуцӏа. Гьеб нуцӏа рагьаравщинав хвасарлъила, жанивеги ина, къватӏивеги вачӏина, квине жоги щвела.

Дун вуго лъикӏав вехь. Дида дирго чахъабиги лъала, дирго чахъабазда дунги лъала.

Дихъе гьел кьурав дир Эмен вуго бищунго хӏалкӏолъи кӏудияв Бетӏергьан. Лъиданиги кӏвеларо гьел дир Инсуда кодоса рахъизе. Дир Эменги дунги – цого руго.

Гьелдаго релълъун, дир Инсуда дунги лъала, дида Эменги лъала. Дица дирго рухӏги кьела чахъабазе гӏоло.

Лъицаниги тӏамулев гьечӏо дун дирго рухӏ кьезе. Дицаго кьолеб буго дица гьеб. Дир ихтияр буго рухӏ кьезеги, кьуни – гьеб нахъе босизеги буго дир ихтияр. Гьедин амру гьабуна дие Инсуца.

Гӏисаца цоги абуна: – Хӏакълъун абулеб буго дица нужеда: дун вуго чахъабазул чолол кӏалтӏа бугеб нуцӏа.

Амма мухьдахъ ккурав вехь вехь гуро, чахъаби чияр ругелъул. Бацӏ рехъалъе бачӏунеб бихьани, рехун гӏиги тун, лъутун уна гьев. Бацӏ рехъалъ речӏчӏула, гӏи рахъ-рахъалде лъутизабула, мухьдахъ ккурав вехьасе гьезул ургъел гьечӏелъул.

Хӏакълъун абулеб буго дица нужеда: нуцӏихъан гурони, цогидаб бакӏалдасан гӏиял чолониве лъугьарав чи ккола цӏогьор яги хъачагъ.