Popular Bible Verses from Rooma 1

Share

Yusɛ̃ɛ Ruu Tɔ̃ɔ Laa kɔɔnang tuu m kpang. Ruu Tɔ̃ɔ Laa kɔ naa vuu palɛnang Laa ɓɔɔ wu ta yuu zang piti, ɓɔɔ ri shing danggn tɔ nɛɛ mani ɓɛɛ. Zang Yahudi kɔ shɔɔnang, wu tɛɛ zang ɓɔɔ zang Yahudi kpang ɓɛɛ.

Ka ruu ɓɔɔ, Ruu Tɔ̃ɔ Laa kɔ tusu zang naa ɓɔɔ Laa shingnɛ, zang wu nwang zang tɔ̃ɔ ka tĩng ɓiɓɛ ɓɛɛ. Nwannang tɔ̃ɔ ɓɔɔ gaayu nɛɛ danggn shinnang, wu waa nyaa nɛɛ mani ɓɛɛ. Naa ɓɔɔ Labeenang Laa kɔɔ ɓɛɛ nɛɛ, “Zang ɓɔɔ ɓi zang tɔ̃ɔ ka tĩng Laa, ka ruu danggn ɓɔɔ wu shing ka bii Laa ɓɛɛ, wukɔ walɛ suru bii.”

Ɓɔɔ bɛ̀ɛ́ Laa mãa koo gn kpang, vuu ɓɔɔ zang zi kpang ka yuu ɓiɓɛ, naa vuu palɛnang ɓiɓɛ nɛɛ nwannang ɓiɓɛ, ri zi tɔ gbayi gbayi. Zang ri zili vuu keɓe katɔ ka vuu ɓɔɔ Laa mãarɛ ɓɛɛ. Ka ruu nɔngkɔ, vuu ɓɔɔ ri jãa nyaa kagn ɓɛɛ kpang.

Ka ruu ɓɔɔ, ri zi Laa tɔ, a ri a wu bannang kaa takpang, nɛɛ wukɔ Laa kpang. Ri ti zã̀a wu kpang. A rɛ̃rɛnang ɓarɛ sɔ̀ɔ gbalang kpang. A yeti ɓarɛ tɔɔyi, ri zi vuu ɓɔɔ kaa takpang.

Ri kɔ̃sɔ ruu niizang ɓɔɔ ka yuu Laa nɛɛ sèé. Ri bang vuu ɓɔɔ Laa mã̀ayi, a ri pálɛ̀ wu shonang, ri yaa Laa ɓɔɔ zang dɔɔ wu dòndòng ka nɔngkɔ. Nɔ́ngkɔ̀.

Gnvɔ Laa tusu bii tɔ nɛɛ lapa, ka yuu zang piti ɓɔɔ ri palɛ vuu shi kpang, nɛɛ zang ɓɔɔ yeti ɓarɛ shi kpang, ɓɔɔ ri kasɛ nɛɛ zang zi vuu ɓɔɔ niizang ka yuu Laa kpang, nɛɛ yeti shi kpang ɓarɛ ɓɛɛ.

Ka ruu nɔngkɔ, Laa yaa ri nɛɛ ri palɛ vuu yusɛ̃ɛ ɓɔɔ yeti ɓarɛ kasɛ ɓɛɛ. Zang soro ɓarɛ ri yaa roonang nɛɛ zang varɛ, ri rooro kaa nɛɛ zang soro kɔ doori. Vuu ɓɔɔ zang pálɛ̀ gngn nɔngkɔ kpang ɓɛɛ. Zang varɛ ri palɛ doo nɔngkɔ, ri yaa roonang tɔ nɛɛ zang soro ri rooro kaa doo nɛɛ zang varɛ kɔ. Zang varɛ ri palɛ vuu yusɛ̃ɛ nɛɛ zɔɔ, ka ruu nɔngkɔ, zang dang ri jĩng naa ɓɔɔ dàá ri ɓɛɛ, ka ruu vuu shi kpang ɓɔɔ ri pálɛ̀ ɓɛɛ. Ka ruu ɓɔɔ, shɔnzang ri kasɛ nɛɛ ri yítì vuu ɓɔɔ niizang ɓɔɔ zang zi ka yuu Laa ka yeti ɓarɛ kpang. Laa yaa ri tɔ ri rɛ̃rɛ vuu ɓɔɔ shi kpang, tɔɔ ri palɛ vuu ɓɔɔ daa naa palɛnang kpang ɓɛɛ.

Ri tɔɔ ri zũng katɔ, a ɓeekpang, ri ɓarɛ shoko. Ka ɓɔɔ ri nɛ̀ɛ́ bang Laa ɓɔɔ nwang ɓi dòndòng, ri bang ɓarɛ vuu ɓɔɔ shɔnzang palɛ, nwàng naa shɔnzang ɓɔɔ vɔ katɔ, nɛɛ jaaning, nɛɛ yɔpɔ jĩngti, a ɓɔɔ rɛɛ vuu ɓɔɔ ri gɔ̃ nɛɛ buru ɓɛɛ.