Popular Bible Verses from Matthew 7

Share

“Nitutamaakw taan e ishi nituweyihtamekw, ekw maak che miikuyekw. Naanituweyihtamukw ekw maak che miskamekw. Papaauhiichekw ekw maak che aapahamaakuyekw.

Wesh tahtu awen kaa nitutamaat chika miyaakanuu aniyuu kaa ishi nitutamaat. Tahtu awen kaa naanituweyihchet chika miskam aniyuu chekwaayuu kaa naanituweyihtahk. Kaye tahtu awen kaa papaauhiichet chika aapahamuwaakanuu.

“Misiwe awen kaa nituhtahk nitayimuwiniyuu kaa ati ihtuutahk maak aniyuu kaa itweuch, mwehch naapeu kaa kachehtaaweyihtahk anite e paahpaachipiskaayich kaa wiikaapuuhtaat waaskaahiikaniyuu iteyihtaakusuu.”

“Taan e ishi nituweyimatwaau awenichii chechii ihtuutamaaskwaau ekun ihtuutamuuch. Eukw uu taapishkun e ishi chiskutamaachemakahch wiishuwewin kaye ekun kaa ishi waawiihtahkwaau uchischiwehiichesuuch.”

Aayiman maak e pimuhtaanuuhch an meskanuu pimaatisiiwinihch kaa itamuhch. Namui maak mihchetu awen miskam aniyuu meskanaayuu.”

“Niishinh ishkwaahtemh, peyakw iyakashkaau ekw an peyakw shaakuwaashuu. An maak ishkwaahtem kaa iyakashkaach wehtan chechii pimuhtaanuuhch an meskanuu anite kaa itamuhch, mikw maak machishkutehch itamuu an meskanuu. Mihchetu maak awenichii pimuhteuch aniyuu meskanaayuu. An maak kaa shaakuwaashich ishkwaahtem ekute chipaa uhchi piihchenaawaau.

Aat e ishpish machaatisiyekw eyuwehch chichischeyihtenaawaau chechii miyu miyekuch chitawaashiimuwaauch chekwaayuu. Etituu maak Kuuhtaawaau kihchikiishikuhch kaa ihtaat chika miyu miiweu taan e ishi nituweyihtamuwaakanuut.”

“Ekaawii wiyaaskunichekw, ekw maak namui chika uhchi wiyaaskunikunaawaau. Wesh taan mikw che ishi kanawaapahtamuwekwe taan e ishi wiyaaskunekw awen ekun mwehch che ishi kanawaapahtahk kaye wiya Chishemanituu wiyaaskunitaakwe. Taan e ishpish miiwet awen chekwaayuu eukun mwehch che ishpish miyaakanuut.

“Ekw awen kaa nituhtahk taan aniyuuh e iteuch ekaa maak kaa ihtuutahk mwehch awen ekaa kaa nisitweyihtahk anite yekaahch kaa wiikaapuuhtaat uwaaskaahiikanim ekun e ishinaakusit.”

Chekwaan wehchi naashch kanawaapahtamuwat chiichishaan e apishaashiyich upishinuun ekaa maak aapateyihtaman e mihchaaskuhch mistikw e pishiniyin chiya. Taanite chechii uhchi itat chiichishaan, ‘Nika wiihkuchihtaan maa chipishinuun,’ chiya maak e mihchaaskuhch mistikw e pishiniyin.

“Ayaakwaamiishtawaahkuch machi uchischiwehiichesuuch. Mwehch maanishchaanishach ishinaakusuuch utah uschich mikw maak piihch anite upimaatisiiwiniwaahch mwehch mahiihkanich iteyihtaakusuuch.” “Aniyuu e itaatisiitwaau ekut che uhchi chischeyimekuch. Mwehch miinishah namui chii nihtaauchinh utuuspiyaahtikuhch maak iinaahtikw namui chii nihtaauchihtaau miinishah.

Wesh e miyu nihtaauchit mistikw e miyusitwaau waapiminich chika nihtaauchuuch anit an mistikw ekw maak ekaa miyu nihtaauchit mistikw namui chika chii nihtaauchuuch e miyusitwaau waapiminich anit mistikuhch.

E miyu nihtaauchit mistikw namui chika chii nihtaauchihtaau machiminh kaye maak ekaa miyu nihtaauchit mistikw namui chika chii nihtaauchitaau miyuminh.

An maak mistikw ekaa kaa miyu miinishuut chika naatwaakahwaakanuu ekw che machishtawepinaakanuut ishkutehch.