Popular Bible Verses from Juan 13

Share

Itu nay baꞌgung urdin nga ibgay kut imyu. Kaꞌilangan nga magsigraras kamu it esa may esa. In magꞌuꞌunu i raras kut imyu, atkayan nagang pirmi i raras mit esa may esa. In magsigraras kamu, makilalaan it kadakel nga mga alagad ku kamu.”

Kayti it aku nga Ampuꞌan baw Manigtulduꞌ mi, miyugas it mga aꞌay mi, kaꞌilangan nga kamu, atkayan naga nga mugas it aꞌay it esa may esat imyu. Sabap binggayan ku na kamu it alimbawa, isaꞌun atkaytu nagay imyu nga buwaten, binwat ku ngaytu.

Katubag si Jesus, maat ya, “Ega magkasepsepan mu kayti i pagbuwaten ku ngaytu, temed in asan nat malangbu-langbusan masepsepan mu naga yan.”

Kamatuudan tu nga kamatuudan i pagꞌaaten ku ngaytu, nga iyan manigsirbi, ega mataꞌas paꞌ kanya it agalen ya. Baw iyan nga tiyaꞌeg lamang, ega mataꞌas paꞌ it nagtaꞌeg it kanya.

In magkasepsepan mi i itung mga bagay, basta buwaten mi lamang makasagya kamu yan.”

Aypaꞌ binwat ni Jesus it magꞌaꞌdung na sira ka kumaꞌen na, timnindeg kanya baw limbas yay panliꞌwan nga pakayan ya, bawnga miyanu kanyat tuwalya ka tiyapis ya. Bawnga timinggis kanya it danum duꞌun it palangganaꞌ. Pagkatgis ya, kiyayaꞌmatan yat mugas i mga aꞌay it mga alagad ya ngayti, baw pagtarapuwan ya nat tuwalya ngayti nga tiyapis ya.