Popular Bible Verses from Aesea 49

Share

Be hem i talem se, ‘?Olsem wanem? ?Woman i save fogetem pikinini blong hem? ?Yufala i ting se hem i save tanem baksaed long pikinini blong hem, we hem nomo i bonem? Maet i gat woman we i save mekem olsem, be mi bambae mi no save mekem olsem long yufala samtaem.

Ol man Jerusalem. Mi mi no save fogetem yufala. Mi mi makem nem blong yufala i stap long han blong mi finis.

“Be Hae God i talem se, ‘!Ol samting we bambae i kamtru i olsem! Ol man we ol soldia ya oli holem olgeta, mi bambae mi karemaot olgeta bakegen, mo ol samting we king ya i holem, bambae mi mi kam pulumaot olgeta long han blong hem. Mi bambae mi kam mekem faet long olgeta we oli stap mekem faet long yufala, mo mi bambae mi sevem ol pikinini blong yufala.

“Hem i talem long mi se, ‘!Man blong wok blong mi! Mi mi gat wan narafala wok blong yu we i bigwan moa. Ol laen blong Isrel we oli laef yet, bambae yu yu mas mekem olgeta oli girap, oli kam strong bakegen olsem fastaem, be i no hemia nomo. Bambae mi mekem yu yu kam wan laet long ol man blong ol narafala kantri, blong bambae mi mi save sevem olgeta man long wol ya.’ ”

Bakegen, profet i talem se, “!Skae, yu sing! !Graon, yu glad, yu singsingaot bigwan! !Ol hil, yufala i girap, yufala i singsing! Mifala ya i man blong Hae God, mifala i stap harem nogud tumas, be hem bambae i gat sore long mifala, hem bambae i leftemap tingting blong mifala.