Popular Bible Verses from 1 Pita 2

Share

Be yufala, God i jusumaot yufala blong yufala i laen blong hem. Yufala i pris blong King. Yufala i man blong wan kantri nomo, we yufala i tabu man blong God, mo yufala i man blong hem nomo. Hem i mekem olsem long yufala, blong yufala i save talemaot ol gudgudfala wok blong hem. Hem i singaot yufala finis blong yufala i aot long tudak, yufala i kam long gudfala laet blong hem.

Taem hem i go long kros, hem i karem olgeta sin blong yumi long bodi blong hem, blong yumi save ded long fasin blong mekem nogud, nao yumi save laef long fasin blong mekem i stret. Ol sobodi ya we hem i karem, i mekem yufala i gud bakegen finis. Bifo, yufala i olsem ol sipsip we oli lusum rod blong olgeta. Be naoia yufala i kambak bakegen long Kraes we i olsem man blong lukaot long sipsip, we hem i prapa man blong lukaot long laef blong yufala.

Fastaem yufala i no man blong God, be naoia yufala i kam man blong hem finis. Fastaem yufala i no haremsave we hem i gat sore long yufala, be naoia yufala i haremsave finis we hem i gat sore long yufala.

Yufala i mas kam we yufala i wantem tumas tok blong God we i klin gud, olsem pikinini we i jes bon i wantem titi tumas. Tok ya i save mekem yufala i kam strong, nao bambae God i sevem yufala.

Ol fren. Yufala i stap long wol ya olsem ol strenja nomo, mo olsem ol man we oli no gat hom blong olgeta. Mi mi talem strong long yufala, se bambae yufala i no mekem ol rabis fasin we tingting blong yufala i wantem. Ol fasin ya oli agensem yufala blong spolem laef blong yufala. Naoia ol man we oli no bilif long God oli stap talem se yufala i man blong brekem loa. Ale, yufala i mas mekem fasin blong yufala i stret gud long fes blong olgeta, blong bambae oli luk ol gudfala wok blong yufala. Nao long Lasdei, taem God i kam blong jajem olgeta, bambae oli save leftemap nem blong God from ol gudfala wok ya blong yufala.

Yufala tu i mas kam olsem ol pos we i laef, blong God bambae i mekem yufala i kam olsem wan haos blong hem we i laef. Nao long haos ya, bambae yufala i olsem ol tabu pris blong God, blong mekem sakrefaes long hem. Mo ol sakrefaes ya blong yufala, hemia we yufala i givim laef blong yufala i go long God. Mo hem i glad blong tekem sakrefaes olsem, from we yufala i joen long Jisas Kraes* blong mekem.

Nao from ol samting ya, yufala i mas lego ol rabis fasin blong yufala. Bambae yufala i no moa letem kros blong yufala i stap longtaem. Bambae yufala i no moa giaman, mo yufala i no moa gat tu tingting. Bambae yufala i no moa jalus, mo yufala i no moa tok nogud long narafala man.

Yufala i mas kam stanap wetem Masta* blong yumi. Hem i olsem wan pos we i laef. Ol man blong wokem haos oli sakem hem, be God i jusumaot hem finis, mo long fes blong God, hem i gud tumas.

Yufala i kam fri man finis, mo fasin blong yufala i mas soemaot samting ya. Be i nogud yufala i yusum fasin ya we yufala i kam fri man, blong haedem sam fasin we i no stret. Yufala i man blong wok blong God, mo fasin blong yufala i mas soemaot samting ya.

Yumi mas mekem olsem from we hemia wan samting we God i wantem, se long ol stret fasin blong yufala bambae yufala i blokem ol krangke tok blong ol man we oli no gat save.