Popular Bible Verses from 1 Johan 3

Share

Kai üng bälung aevaw saite caw nade na ä, mä-ai üng bälung aevaw saite lä älo hai ma qaitä aecyng haw y. Mitang khaw saite hai kähawi na sa kha mä-ai üng bälung aevaw saite na tea mätü ö si ba.

Isu Khrista lä äma üng hing saite mä-ai tähang py te phüng-a, bälung aevaw saite lä äte mei näte tea mä-ai lä mäny haw ö te vi. Mä-ai la rawijae na tähang mä-ai üng hing saite tea py hethang kae ö te by vi.

Mä-ai üng Pä-ai Säthaw lä matangtä mä-ai tea bälung aevaw mei näte aedawng ö lawi. Säthaw lä mä-ai bung äma üng caw nade na näkha mäthi te vi. Mä-ai lä äni üng caw nade na tätang khaw ö vi dy. Hini älawngpre hai aesui saite khimi na ma mä-ai bung mäny y te lä Säthaw tea mäny ö y te phüng-a vi.

Hunghö na sa jawjaw saite na lä Setan angra hai aesui saite na vi. Ätephüng-a mei nädylä Setan angra lä angcü üng hai ma hunghö na sa te phüng-a vi. Tukätephüng-a Säthaw üng Cäpaw lä Setan angra üng kälu na tea täphra hethang ly te vi dy.

Säthaw üng caw nade na lawng saite lä hunghö na tea sa jawjaw ö y lyng. Säthaw üng hing saite lä äni ce äthung-a awng te phüng-a vi. Säthaw lä äni ce üng Äpä-ai vi te phüng-a hunghö na sa haw jawjaw y dy lyng.

Khimi lawngtä lä mä-ai ma tawngnang kha rawijae na mätang te tea säbawng hethang ngai y te vi rawng dylä, Säthaw tea bälung aevaw näkha thui haw ö te y lyng.

Äni üng Ubädi na tea tängai saite na lä Säthaw hai bungtä awng kha Säthaw la äni ce hai bungtä awng te by vi. Säthaw ma mä-ai tea py saite Muilaw Käcai hai-a Säthaw lä mä-ai hai bungtä awng saite tea mä-ai lä mäny haw ö te vi.

Tukätephüng-a Säthaw üng caw nade na hai Setan angra üng caw nade na näte tea lä hini kätyng-a mäny haw ö vi. Kätüng sa y saite khimi na, yng saite rawijae na tea bälung aevaw y saite na lä Säthaw üng caw nade na y lyng.

Nang ce angcü üng hai ma thai saite angthang lä lawng lawngtä tea bälung aevaw ö hethang kae näsaite vi.

Kai üng rawijae na ä, älawngpre üng khimi na ma nang ce tea esäre dylä cangxei ö hang.