Popular Bible Verses from Esaya 60

Share

We Yerusalema, suka u yima u vangama, hikuva ku vonakala ka wena ku tile, ni ku dzuneka ka HOSI Xikwembu ku le henhla ka wena.

Kutani vanhu va matiko man'wana va ta ta eku vonakaleni ka wena, tihosi ta vona ti ta ta loko ti ku vona u lo nghéé, kukotisa dyambu.

Vona, xinyami lexikulu xi ta funengeta misava ni vanhu, kambe HOSI Xikwembu xi ta suka xi yima, kutani ku dzuneka ka xona ku ta vonaka ehenhla ka wena.

Mindyangu leyitsongo yi ta kula swinene, yi va ni vanhu va magidi-gidi. Loko nkarhi wu ta va wu fikile, ndzi ta endla leswaku swilo leswi swi hatla swi humelela. Hi mina HOSI!”

“Ninhlekanhi a wu nga ha voningeriwi hi dyambu, na wona n'weti a wu nga ha ku voningeli, hikuva mina HOSI Xikwembu xa wena, ndzi ta va ku vonakala ka wena, hilaha ku nga heriki, hi mina ndzi nga ta va ku dzuneka ka wena.

Mina dyambu ra wena ni n'weti wa wena, a ndzi nga ha peli kumbe ku nyamalala. Ndzi ta va ku vonakala ka wena hilaha ku nga heriki, masiku ya wena ya swirilo ma ta va ma herile.

Loko u vona sweswo, u ta tsaka swinene, mbilu ya wena yi ta tlula-tlula, yi khapa hi ku tsaka, hikuva u ta tiseriwa rifuwo ra vamatiko, xuma xa vona xi ta nghena ka wena hi ndlela ya lwandle.

Tlakusa mahlo u rhalarhala matlhelo hinkwawo: Vona, hinkwavo va le ku hlengeletaneni, va karhi va vuya eka wena; vana va wena va xinuna va ta vuya ematikweni ya le kule; lava va xisati va ta vuya va beburiwile kunene.

Vanhu va wena va ta va lava lulameke hinkwavo, tiko ri ta va ra vona hilaha ku nga heriki. Va ta va hluke ra ximilana xa mina, wu nga ntirho wa mavoko ya mina lowu ndzi nga ta dzunisiwa ha wona.

Etikweni ra wena, a ku nga ha twali timhaka ta vanhu va tihanyi, huwa ya ku hlasela ni ku herisa swilo yi ta nyamalala. Makhumbi ya wena, u ta ma thya vito ra ‘Loyi-a-ponisaka’, ni tinyangwa ta wena u ta ti thya vito ra ‘Loyi-a-twarisiwaka’.

Tinyangwa ta wena a ti nga ha pfariwi, ti ta tshama ti pfuriwile vusiku ni nhlekanhi, hikuva vanhu va ta ku tisela xuma xa matiko ya vona, tihosi ta vona ti ta va rhangela emahlweni.

Mintlhambi leyikulu ya tikamela yi ta fika yi ku mbhombhela yi huma eMidiyani ni le Efa; hinkwavo va le Xeba va ta fika va rhwele nsuku ni mirhi ya risuna, va twarisa HOSI Xikwembu, va xi dzunisa.

HOSI Xikwembu xi byela muti wa Yerusalema, xi ku: “Vanhu va matiko man'wana va ta pfuxa makhumbi ya wena, tihosi ta vona ti ta ku tirhela. Enkarhini lowu a ndzi hlundzukile, ndzi ku bile, kambe sweswi ndzi ta ku tsakela, ndzi ku komba tintswalo.

“Hambileswi a wu tshikiwile, u tlhela u nyenyiwa, ku pfumala na un'we la hundzaka hi le ka wena, sweswi ndzi ta ku nyika ku dzuneka loku nga heriki; u ta tsakisa vanhu va minkarhi hinkwayo.

Vanhu va matiko ni tihosi ta vona, va ta ku tisela rifuwo ra vona leswaku u ri tirhisa. Kutani u ta swi tiva leswaku mina HOSI ndzi muponisi wa wena, ni leswaku ndzi mukutsuri wa wena, ndzi ntamu wa va ka Yakobo.