Popular Bible Verses from Kuxh 13

Share

Tul mamala xaol laʼ txhiʼan setiʼ, tiʼ venimat in. Pet jaʼl ex, uvaʼ tira kʼayimal etaanima tiʼ vinnimaleʼ, tul aʼetz exe, uvaʼ laʼ kolox ex vatz u kʼaxkʼo uvaʼ laʼ taqʼ quBʼaal Tiuxh tiibʼa inqʼa aj paʼvom. Echetz yeʼ laʼ etanbʼat kae vinnimaleʼ tetxhal ekameʼ.

Tul ¡noqxh etil etibʼ! Atz ¡natxhnotxhoq etatineʼ! Atz ¡bʼanoq kuxh etutxheʼ! [Tul natxhvaq Tiuxh.] Tan yeʼ etootzaqle jatu laʼ ul in inpaqte.

Poro yeʼl ex laʼ el etaanima, tiʼ uvaʼs laʼ etiqʼol vatz inqʼa iqʼesal. Atz jitoq laʼ etitzʼa kam uvaʼ laʼ etala. Pet taʼn kuxh laʼ etal kam uvaʼ laʼ tal quBʼaal Tiuxh t-vetitzʼabʼal tuulbʼal uvaʼs een vet ex vatz inqʼa iqʼesal. Tan jit kuxh vet ejunal laʼ yolon ex, pet aʼ vet viTiuxhil Tiuxh laʼ yolon tetziʼ.

Tan jankʼalxh inqʼa inyol uvaʼ nik valeʼ, tan tetxhal kuxh laʼ motx elaʼpun. Pet u vatz txʼavaʼ, atz u vatz amlikaʼ, tan tetxhal laʼ pali, atz laʼ jalpi.

Poro yeʼxhabʼil invaʼq inqʼa xaol, ootzaqin tetz kam qʼij, atz kam oora laʼ ul in inpaqte. Atz jitoq inqʼa aanxel, uvaʼ een t-amlikaʼ, ootzaqin tetz. Atz jitoq in, in viKʼaol quBʼaal Tiuxh. Pet taʼn kuxh u quBʼaal Tiuxh ootzaqin tetz.

Tul laʼ motx etabʼi uvaʼ mamala txhʼaʼo sebʼte. Atz laʼ motx etabʼi uvaʼ tal kuxh vet laʼ motx iyolvat inqʼa xaol s-vatzaq tiʼ u txhʼaʼo. Poro yeʼl ex laʼ motx xoʼv ex, tan echxh laʼ ibʼane. Poro yeʼxnaqetz opoonnaʼqle viqʼiil vimotxtebʼal.

Echetz natxhnotxhoq kuxh etatineʼ, tan yeʼ etootzaqle jatu laʼ ul in. Tan ech laʼ vul inpaqte, eche laʼ tul u aj otzotz. Tan maq aʼ laʼ iqʼeqxeʼ; atz maq aʼ, laʼ itxhaqʼaan aqʼbʼal; atz maq aʼ laʼ toqʼ kaxhan; atz maq s-qʼalaʼm. Tan yeʼ kuxh taqla laʼ ul in. Tul yeʼ insaʼ uvaʼ ech laʼ ul inleqt ex, eche ivat vaʼq xeen tziʼ jubʼal. Tan jankʼalxh inqʼa yol uvaʼ nik valeʼ, tan etetz tuchʼ inqʼa niman vetz. Echetz ¡natxhnotxhoq kuxh etatineʼ! —xeʼt Jesuus te inqʼa nikich itxhus tibʼ s-kʼatza.

Tan laʼ itxhʼaʼoi tibʼ inqʼa nimla tenam s-vatzaq. Tul laʼat motx itxhʼaʼoi tibʼ inqʼa mam iqʼesal s-vatzaqil. Atz laʼ pal kabʼnaano tuulbʼalaq inqʼa tenam. Tul mam vaʼy laʼ ibʼana. Tul laʼ kuxh motx vavalkabʼ vet inqʼa xaol. Ayaʼletz kuxh inqʼae, laʼ utxhi uvaʼs yeʼnaq uloq in vatz txʼavaʼ inpaqte. Poro aʼetz kuxh vixeʼtebʼal u mam kʼaxkʼoe, eche laʼ ixeʼt itxhoʼm vaʼq ixoq tiʼ talal vineʼ.

Bʼaxaetz laʼ nal paxsal inuqul inqʼa bʼaʼnla txhaq yol s-viʼ tuulbʼal inqʼa tenam s-kaqaayil, yaʼne laʼ opoon vet vimotxtebʼal.

Tan at inqʼa laʼ uli uvaʼ laʼ kʼamon vinbʼij. Tul ech laʼ motx tal junun s-eche: «Ine u Kriisto,» chaq tul junun. Tul mamala xaol laʼ teesa t-bʼey.

Echetz antxh ex, etil etibʼ jununil ex, tan laʼ motx pal ex titzaʼlal tiʼ vinnimaleʼ. Tan laʼ oksal ex vatz inqʼa aqʼol kuʼ yol tinuqul. Tul antxh laʼ tzʼuʼmalik ex t-inqʼa kʼulbʼal ibʼ. Atz laʼ iqʼol ex vatz inqʼa iqʼesal inqʼa nimla txhaq tenam, atz vatz jolt inqʼa mam iqʼesal. Echetz laʼ etalt vete, kam inqʼa ilel etaʼn s-viʼ, te inqʼa iqʼesal.

Tan antxh laʼ txhejk inqʼa xaol sexoʼl uvaʼ laʼ tzʼeqon tzij. Tul: «Ine u Kriisto,» chaqe. Atz laʼ tal tibʼ s-qʼexsan tetz viyol quBʼaal Tiuxh. Tul laʼ motx ikʼutxh txha inqʼa etxhlal, atz inqʼa mam yol tilix sevatz, tiʼ tetxhbʼul eteesal t-bʼey. Tul aʼ kuxh kʼaqel taʼn, uvaʼ laʼ motx el inqʼa ichʼexoʼm quBʼaal Tiuxh t-bʼey. Poro oq ech laʼ tal invaʼq u xaol sete s-eche: «Il u Kriisto, ile uya.» Atz «Ile at tzitzi,» chaq eʼl ex, pet yeʼ laʼ eqej u yol.

Poro taʼn kuxh laʼ pal u mam kʼaxkʼo tuulbʼal inqʼa qʼij inqʼae, tul: «Laʼ tokbʼix ivatz u qʼij. Atz yeʼ laʼ txiqun vet u ichʼ. Tul laʼ motx el tzaan inqʼa txʼumil vatz amlikaʼ. Atz jankʼalxh uvaʼ at vatz amlikaʼ laʼ jalp tatineʼ.»