Popular Bible Verses from Juan 10

Share

“Imonda wae jaeño ou oñomi waerä, jare upuruyuka waerä, jare upurukachi waerä. Erëi che jokuaerä'ä ko ayu. Che ayu ko amee waerä tekowe opa mbae wae cheré wɨrowia wae reta pe. Jare jokua tekowe onoi reta yawe, tuicha rupi uyekouta reta,” jei Jesús chupe reta.

“Jare che ko jae owecha reta iyandarekoa ikawi wae rami. Pëti owecha reta iyandarekoa ikawi wae umeeta jekowe iowecha reta re uepɨ reta waerä,” jei.

“Cheowecha reta uyapɨsaka chiñee re. Jare che aikuaa kawi cheowecha reta, jare jae reta uwata cheraɨkue.

Che amee chupe reta tekowe opa mbae wae, jare jae reta ndarau etei yuraa Tatawasurenda pe. Añetete, mbaetɨ kiawe ipuere upɨ̈ro reta chepo wi,” jei chupe reta.

“Che ko jae owecharokai jöke rami,” jei. “Ime yawe kía uñepɨ̈ro cheré wae, che aepɨta ko. Jae ikota pëti owecha ipɨawiwe wae rami. Jae ipuereta oë oo ukaru uyemɨngapɨɨ kapii re rami. Jare mbae uyamondo yawe, ipuereta osi oo jokai pe uike uñepɨ̈ro waerä. Jukuärái ko, echa’ä iyandarekoa umae kawi oï jese ramo,” jei chupe reta.

“Che ko jae owecha reta iyandarekoa ikawi wae rami. Echa’ä aikuaa kawi kía kía ko cheowecha reta wae, jare jae reta chekuaa kawi wi.

“CheRu etei ko umee reta chewe yureko waerä chemaerä. Jare mbaetɨ kiawe ipuere upɨ̈ro reta cheRu ipo wi, echa’ä cheRu imbaepuere tuichaete ye ko opaete wae wi. Añetete, che jare cheRu pëtiño ko noï,” jei chupe reta.

Kërái cheRu chekuaa kawi jare che aikuaa kawi wi cheRu, jukuärái wi cheowecha reta ndiwe nduyekuaa kawi. Jare che ameeta ko cherekowe cheowecha reta re aepɨ reta waerä,” jei Jesús chupe reta.

Mbaetɨ kía ipuere upɨ̈ro chewi cherekowe, erëi amanota aï chekɨrëɨ rewe. Chepuere amee cherekowe, jare ime wi anoi mbaepuere aikowe ye waerä. Jukuärái chepuere ayapo, echa’ä jokuaerä cheRu chembou ayapo waerä. Jokua añawe che jae pewe,” jei Jesús chupe reta.

Jayawe Jesús jei wi chupe reta: “Che tae pewe añetete wae, che ko jae jokua owecharokai jöke rami. Echa’ä che rupiño ko ipuere uike kía Tumpa jëta pe,” jei.

“Erëi jukuärai’ä ko kía korepoti reño owecha re uyandareko wae. Jae jae’ä ko owecha reta iyandarekoa ikawi wae jare jae imbae’ä ko owecha reta. Jáeramo jae uecha yawe yawapɨ̈ta ou oï ikotɨ, jae osi jare opa ueya owecha parawete reta. Jayawe yawapɨ̈ta ou uipɨsɨ amokue owecha reta, jare ïru owecha reta opa uñemɨái,” jei.

Jayawe Jesús jei umbɨjaanga rewe: “Che tae pewe añetete wae, jaeño imonda wae reta uike’ä owecharokai pe jöke rupi. Jae reta uike wɨari ikotɨ̈a rupi,” jei.