Popular Bible Verses from Loˇmaˆ sahˬ boꞈ 15

Share

Muiˬ-eu Shawˇ-eu Yaw sahˇ Miˬyehˇ-euˬ baoˬ baˬ da neh naw maꞈ-euˬ noeˬ tmˬ-eu jeˬ huiˬ laˇ mahˇ laˇ nya ni, naw maꞈ Miˬyehˇ-ahˇ jah-eu jeˬ-ahˇ gʼoe-awˇ, noeˬ tmˬ-eu jeˬ-euˬ dawˬ pehˬ duˬ puˇ pyeuꞈ-eu Miˬyehˇ naw maꞈ-ahˇ laˬ kʼaˬ cehˇ nui saˇ za-eu jeˬ bi byah laˇ luꞈ-uˇ.

Jaˇliꞈ laꞈ kʼoeˇ kʼaˇ boꞈ taˬ-euˬ yawˬ jeˬ na luꞈ, aˬ dui-ahˇ bi mehˬ bi tsoˆ-eu gʼaˇ duˬ boꞈ taˬ-euˬ meh. Aˬ dui nui ma gʼawˬ mahˇ ni taˬ nya laˇ-eu gʼaˇ duˬ mehˬ nehˬ tsoˆ nehˬ laꞈ-awˇ, aˬ dui-euˬ nui ma-ahˇ gʼaˬ biꞈ lahˬ nehˬ laꞈ-eu laꞈ kʼoeˇ noeˬ tmˬ kʼaˇ za laˇ ni boꞈ taˬ-euˬ jeˬ pyeuꞈ-eu meh.

Yeˬsuˇ Ka li-ahˇ dzaw geuꞈ-eu laꞈ kʼoeˇ naw maꞈ nui ma tiˬ siˬ tehꞈ-ehˇ taˬ-awˇ dehꞈ nya ni, nui ma gʼawˬ mahˇ ni taˬ-eu jeˬ biꞈ laꞈ-awˇ nui ma-ahˇ gʼaˬ biꞈ lahˬ nehˬ laꞈ-eu gʼaˬ pyeuꞈ-eu Miˬyehˇ naw maꞈ-ahˇ caw ba luꞈ-uˇ. Kʼoeˇ miˇ neh, naw maꞈ dawˬ tawˆ luꞈ teˇ saˇ tiˬ saˇ tehꞈ-ehˇ aˬ dui-euˬ Sahˬpaˬ Yeˬsuˇ ka liˬ-euˬ Aˬda Miˬyehˇ-ahˇ ja ceuˬ nya luꞈ-uˇ.

Ka li naw maꞈ-ahˇ ha geuꞈ-euˬ loꞈ-ehˇ, Miˬyehˇ-euˬ yaw shehꞈ kʼahˬ sehˇ-ahˇ aˬ cawˬ ya mawˇ ni naw maꞈ tiˬ gʼaˬ tiˇ gʼaˬ ha geuꞈ-awˬ.

Aˬ dui-euˬ cawˬ Ka li zaˬ deuˬ jah-eu laꞈ kʼoeˇ huiˬ laˇ mahˇ laˇ nya ni, aˬ dui yawˬ gʼaˬ na luꞈ aˬ yawꞈ maꞈ gʼaˇ duˬ muiˬ ni mˇ-eu tsaˬ meh.