Popular Bible Verses from 1 Yoˇhaˬ 4

Share

Gʼoeˇ-eu gaˬ-eu jeˬ laꞈ kʼoeˇ, guˆ-eu jeˬ maˬ ahˇ-a. Byah-eu gʼoeˇ-eu gaˬ-eu jeˬ-aˬ, guˆ-eu nui ma bi byoˆ-iˇ-eu meh. Kʼoeˇ miˇ neh, guˆ-eu nui ma ahˇ-eu tsawˇ haˬ laꞈ kʼoeˇ gʼoeˇ-eu gaˬ-eu jeˬ maˬ byah laˇ nya-a. Aˬ jeˬ miˇ neh ehˇ naˇ, guˆ-eu jeˬ-aˬ, kʼehˬ-eu kʼaˆ-eu jeˬ-ahˇ ya daˬ luꞈ gaˇ duˇ-eu meh.

Ehˇ kʼawꞈ, ngaˇ gaˬ dui dui-eu zaˬ deuˬ-oˇ, naw maꞈ-aˬ, Miˬyehˇ-ahˇ taꞈ-eu tsawˇ haˬ pyeuꞈ-awˇ, Miˬyehˇ gʼaˇ duˬ ngehˬ dah-eu maˬ ngeuˇ-eu tsawˇ haˬ kʼoeˇ deuˬ-ahˇ gʼaˬ leˇ-euˬ meh. Aˬ jeˬ miˇ neh ehˇ naˇ, naw maꞈ laꞈ kʼoeˇ jawˇ luꞈ-eu Yaw sahˇ-aˬ, miˇ tsaˬ heu-ahˇ taꞈ-eu tsawˇ haˬ deuˬ laꞈ kʼoeˇ jawˇ luꞈ-eu yaw sahˇ naˆ maˬ tseˇ baoˬ ahˇ dzehˬ-eu meh.

Miˬyehˇ aˬ dui-ahˇ jeˬ hu gaˬ-euˬ miˇ neh, aˬ dui aˬ yawꞈ-ahˇ gaˬ-awˇ, tiˬ gʼaˬ tiˇ gʼaˬ gaˬ-eu ma.

Ngaˇ gaˬ dui dui-eu cawˬ deuˬ-oˇ, aˬ dui tiˬ gʼaˬ tiˇ gʼaˬ gaˬ kaˇ-euˇ. Aˬ jeˬ miˇ neh ehˇ naˇ, gʼoeˇ-eu gaˬ-eu jeˬ-aˬ, Miˬyehˇ jawˇ gaˇ neh doˆ le-euˬ meh. Gʼoeˇ-eu gaˬ-eu jeˬ kʼaˇ ahˇ-eu tsawˇ haˬ-aˬ, Miˬyehˇ-euˬ zaˬ pyeuꞈ-awˇ, Miˬyehˇ-ahˇ siˬ nya-eu meh.

Gʼoeˇ-eu gaˬ-eu jeˬ maˬ kʼaˇ ahˇ-eu tsawˇ haˬ-aˬ, Miˬyehˇ-ahˇ maˬ siˬ nya-a. Aˬ jeˬ miˇ neh ehˇ naˇ, Miˬyehˇ-aˬ gʼoeˇ-eu gaˬ-eu jeˬ pyeuꞈ-eu meh.

Gʼoeˇ-eu gaˬ-eu jeˬ-aˬ, heu loꞈ-ehˇ meh. Aˬ dui Miˬyehˇ-ahˇ gaˬ-euˬ maˬ ngeuˇ. Aˬ yawꞈ aˬ dui-ahˇ gaˬ-awˇ, aˬ dui-euˬ iˬ baˇ bi pi dzeh le-eu gʼaˇ duˬ aˬ yawꞈ-euˬ Zaˬmaˇ-ahˇ kʼehˇ gʼeh leꞈ-euˬ meh.

Ngaˇ gaˬ dui dui-eu cawˬ deuˬ-oˇ, Miˬyehˇ aˬ dui-ahˇ kʼoeˇ naˆ ni gaˬ gaˇ keuˆ-eu-aˬ, aˬ dui tiˬ gʼaˬ tiˇ gʼaˬ gaˬ-eu tsaˬ tehꞈ-a.

Miˬyehˇ-aˬ, aˬ yawꞈ-euˬ Zaˬmaˇ tiˬ gʼaˬ tehꞈ-ehˇ jawˇ-eu kʼawꞈ, Zaˬmaˇ baˬ da neh aˬ dui dehꞈ-eu jeˬ za nya ni miˇ tsaˬ kʼoeˇ taˆ kʼehˇ gʼeh le-awˇ, aˬ yawꞈ-euˬ gʼoeˇ-eu gaˬ-eu jeˬ aˬ dui-ahˇ bi mawˇ laꞈ-euˬ meh.

Tsawˇ haˬ tiˬ gʼaˬ Miˬyehˇ-ahˇ gaˬ ma lehˇ ehˇ kʼawꞈ, Ka li zaˬ cawˬ cawˬ maˬ gaˬ naˇ, jaˬ myawꞈ myawꞈ-eu tsawˇ haˬ meh. Aˬ jeˬ miˇ neh ehˇ naˇ, yawˬ ha ya mawˇ luꞈ-eu Ka li zaˬ cawˬ cawˬ maˬ gaˬ naˇ, maˬ ya mawˇ-eu Miˬyehˇ-ahˇ aˬ joˆ-ehˇ gaˬ nmˇ.

Yeˬsuˇ-aˬ, Miˬyehˇ-euˬ Zaˬmaˇ meh lehˇ kʼaˇ ehˇ-eu tsawˇ haˬ-aˬ, Miˬyehˇ-euˬ laꞈ kʼoeˇ jawˇ-eu tsawˇ haˬ pyeuꞈ-awˇ, Miˬyehˇ kʼawꞈ, aˬ yawꞈ-euˬ laꞈ kʼoeˬ jawˇ-eu meh.

Ka li neh aˬ dui-ahˇ biꞈ taˬ yaꞈ-euˬ dawˬ-aˬ, heu loꞈ-ehˇ meh. Miˬyehˇ-ahˇ gaˬ-eu tsawˇ haˬ-aˬ, Ka li zaˬ cawˬ cawˬ ya gaˬ meh.

Ngaˇ gaˬ dui dui-eu cawˬ deuˬ-oˇ, Yaw sahˇ Miˬyehˇ za-euˬ tsawˇ haˬ ma lehˇ kʼaˇ ehˇ laˇ gaˇ naw maꞈ maˬ jah ni, aˬ yawꞈ maꞈ za-euˬ yaw sahˇ kʼoeˇ Miˬyehˇ jawˇ gaˇ neh oe-euˬ nga loˇ lehˇ jeˬ huˬ lawˬ haw-awˬ. Aˬ jeˬ miˇ neh ehˇ naˇ, Miˬyehˇ gʼaˇ duˬ ngehˬ dah-eu maˬ ngeuˇ-eu tsawˇ haˬ deuˬ miˇ tsaˬ doe ni iˇ byah taˬ-euˬ meh. Maˇ maˇ ni Miˬyehˇ-euˬ Yaw sahˇ ngeuˇ-eu maˬ ngeuˇ-eu naw maꞈ heu loꞈ-ehˇ siˬ duˬ nya tehꞈ-a. Yeˬsuˇ Ka li-aˬ, maˇ maˇ ni tsawˇ haˬ zaˬ-euˬ shiˬ shaˬ jiˇ pi-awˇ oe-euˬ meh lehˇ kʼaˇ ehˇ-eu tsawˇ haˬ-aˬ, Miˬyehˇ jawˇ gaˇ neh oe-euˬ Yaw sahˇ za taˬ-euˬ tsawˇ haˬ pyeuꞈ-eu meh.

Ehˇ kʼawꞈ, kʼoeˇ loꞈ-ehˇ maˬ ngeuˇ-a lehˇ ehˇ-eu tsawˇ haˬ-aˬ, Miˬyehˇ jawˇ gaˇ neh oe-euˬ Yaw sahˇ za-euˬ tsawˇ haˬ maˬ ngeuˇ-a. Aˬ yawꞈ za-euˬ yaw sahˇ kʼoeˇ-aˬ, Ka li-ahˇ Muiˇ-eu gʼaˬ jawˇ gaˇ neh oe-euˬ yaw sahˇ pyeuꞈ-eu meh. Aˬ yawꞈ oe tehꞈ-a lehˇ naw maꞈ ya gaˬ taˬ-euˬ meh. Nymˬ-mˇ aˬ yawꞈ miˇ tsaˬ heu kʼoeˇ taˆ oe keuˆ taˬ-euˬ meh.