Popular Bible Verses from MIKA 4

Share

Pointikid-tikid do bansa' do hiti'd pomogunan, om mumboyo' i' om tumuku' dot id tingolig dau. Nga' iyati' nga' mumboyo' indo do TUHAN i Kinorohingan toko', om tumuku' toko' dot id dau do gisom dot alaid.

Om momoros nondo i tulun diri do poingkaa, “Kainou tumakad do hilo'd nulu-nulu do TUHAN, do kumaa do hilo'd Walai'd Sasambayangan dot Agayo di tukuon dot Israil, i tulun dau. Tudukan toko' nondo dau di korohian dau do wonsoyon toko'; om sumusui toko' nondo di ralan di nopili' dau. Tu' tadon nopo do ponudukan do TUHAN om hilo'd Yorusalim; om hilo'd Sion o tadon do TUHAN do moro-boros dot id tulun dau,” ka nondo diyolo'.

Koimbagu nopondo om iri nopo nulu-nulu di pinoingkakatan di Walai'd Sasambayangan dot Agayo om osiliu do nuluhon dot akawas kopio, it akawas po ko' mantad di konulu-nuluan do suwai. Om ogumu' nondo o bansa'd tulun do mogiwoyo-woyo' do mongoi'd hiri.

Salasayon nondod TUHAN o pogitatagadan dot id pogialatan di bansa' do hiti'd pomogunan, om id pogialatan do pomogunan dit ongokoris di hilo'd sodu' om i hiti'd somok. Om wonsoyon nondo diyolo' do radu i gayang diyolo' om wonsoyon do pisau do ponunutu' i tandus. Om a' nondo mogisasangod i piro-piro o bansa', om a' sumodia' do mongoi sangod.