Popular Bible Verses from Isaiah 9

Share

Siku anak mit udah ada ke kitai! Siku anak lelaki udah diberi ngagai kitai! Lalu iya deka nyadi raja kitai. Iya deka dikumbai “Penyaup ti Badas,” “Allah Taala ti Bekuasa,” “Apai ti Meruan belama iya,” “Raja Pemaik.”

Orang ke bejalai dalam petang udah meda penampak ti besai. Sida diau di menua pemetang, tang diatu penampak manchar ngagai sida.

Kuasa diraja iya deka majak mansang. Perintah iya deka seruran bisi pemaik. Iya deka megai perintah nganti Raja David, nudukka kuasa iya ba atur ti ngena sereta lurus, kenyau ari diatu nyentuk ngagai pengujung dunya. TUHAN ti Pemadu Bekuasa endang mutus ati deka ngereja semua utai tu.

Kasut bala soldadu ti datai nyerang enggau semua gari sida ke dibalut darah deka dirusak ngena api.

Sida nadai jalai ngerarika diri ari maya penusah tu. Menua raban bansa Sebulun enggau Naptali udah sekali kena pechat, tang jemah ila menua nya deka dibasa, berengkah ari Tasik Tengah nyentuk ngagai menua ti di timur Sungai Jordan, enggau ngagai menua Galili empu, ti alai orang kampar diau.

Nuan udah ngasuh sida balat gaga, TUHAN. Nuan udah ngasuh sida lantang ati. Sida rami gaga ke utai ti udah dikereja Nuan, baka orang ke rami gaga lebuh sida ngetau gandum tauka lebuh sida bedua perapasan.

Laban Nuan udah matahka kungkung ti nating sida enggau tungkat ti malu bau sida. Nuan udah ngalahka bansa ti nekanka pengidup sereta ngambi ulih ba nembiak Nuan, baka Nuan ti ngalahka bala soldadu orang Midian dulu kelia.