Popular Bible Verses from Ulang Adat 30

Share

Aku diatu ngasuh kita milih entara pengidup enggau pemati, entara berekat enggau sumpah, lalu aku ngangauka langit enggau tanah nyadika saksi utai ti dipilih kita. Pilih pengidup. Rinduka TUHAN Allah Taala kita. Titihka Iya, lalu tetap ati arapka Iya. Nya baru kita enggau peturun kita deka gayu-guru nguan menua ti udah disemaya deka diberi Iya ngagai aki ini kita, Abraham, Isak, enggau Jakop.”

Enti kita ngasika pesan TUHAN Allah Taala kita, ti diberi aku ngagai kita sehari tu, enti kita rinduka Iya, ngasika Iya, lalu nitihka semua adat Iya, nya baru kita deka bulih pengaya lalu nyadi bansa ti kering. TUHAN Allah Taala kita deka merekatka kita di menua ti baru deka diempu kita.

Ku Moses bejaku, “Sehari tu aku ngasuh kita milih entara pemadas enggau penyai, entara pengidup enggau pemati.

Jaku nya semak kita. Iya diau dalam nyawa enggau dalam ati kita, ngambika kita ngasika iya.

TUHAN Allah Taala kita deka meri ati ti ngasi ngagai kita enggau ngagai peturun kita, ngambika kita deka rinduka Iya enggau pengabis ati kita, lalu kita deka mengkang diau di menua nya.

TUHAN deka ngasuh kita kaya-raja dalam semua utai ti dikereja kita. Kita deka mayuh anak, enggau mayuh jelu tupi, lalu tanah kita deka mansutka mayuh asil. Iya deka gaga ati ngasuh kita kaya-raja, baka Iya ti udah gaga ati ngasuh aki ini kita kaya-raja

Tang enti kita enda ngasi, lalu enggai mending, lalu dibai limpang besembahka petara bukai, kita deka dirusak. Aku meri jaku tangkan tu ngagai kita diatu: kita enda panjai umur nguan menua ti di seberai Sungai Jordan din, ti baru deka diempu kita.

Ku Moses bejaku, “Pesan ti diberi aku ngagai kita sehari tu ukai utai ti kelalu mar dititihka kita, tauka enda ulih dijengkau kita.

Iya ukai di langit din, lalu kita enda ibuh nanya, ‘Sapa deka niki ke atas lalu mai iya nurun ngagai kitai, ngambika kitai ulih ninga iya, lalu ngasika iya?’

Iya ukai mega di seberai tasik ti besai. Nya alai kita enda ibuh nanya, ‘Sapa deka ngelayang tasik ti besai tu lalu mai iya ngagai kitai, ngambika kitai ulih ninga iya, lalu ngasika iya?’