Popular Bible Verses from Marcos 13

Share

*La kaín chojni tso̱nínkakohanra sin kixin tinkachónkira ti janhan. Kjánchó ti sin tsíto̱ehya tsinkáchónki ti janhan hasta tsjixixín mé tsaá sin.

’Méxra̱ chrókóxakohanra, chrókꞌuejotsjehera la ko chrónixjehéra Díos kixin noahñara nkesá la ko nkehora tso̱hen tíha.

Ti ó sátsjikoára sin, tsjikaánra sin ti tjejó ti sin tꞌe̱to̱an, la tóxakuanhñara nkehe tsjate̱héra. Jehó chro̱nkara ti nkehe tsjajon Díos tsondáchrora ti hora a, kixin jahyara tsonixjara. Náhí. Ncha̱kuén Díos mé tsonixja.

Ti nka̱jní la ko ti chjasintajni la tsꞌitjáña. Kjánchó ti nkehe ndáxrja̱n la tsꞌitjáñahña nkochríxín.

*’A̱ndá ti ña̱o a, la ko ti hora tsoxiteyá tíha la ninkexró noehña, ni ti sin ángel tjejó nkaya nka̱jní, ni ti Xje̱en Díos kꞌóna Chojni; jehó Itꞌéni Díos mé nohe tíha.

’A̱ndá ti ó tsinhínra kixin siín guerra la tꞌóñá kícho sin la chróchrakonhñara, kixin ticháxi̱n xi̱kaha tso̱hen tíha, kjánchó na̱xa̱ tsjeje̱hya chjasintajni.

Méxra̱ chrókꞌuejotsjehera kixin noahñara nkesá tsokjan ìnché ti nchia, á ijnko tso̱ntanonte o̱ ijnko kꞌaxrotjen o̱ ti ó itsje ti kochíká o̱ ti ó tsꞌinkaséña. Ndá xrína̱hña itsi chꞌan la tsꞌitjaxín chꞌan kixin tjejochri̱nra. Mé xi̱kaha tjo̱nka̱ra la ko xi̱kaha ndátjan kaín chojni kixin chrókꞌuejótsjehe sin.

Ijnko nación tsjajo̱nko íjnko nación. La nkuíxín tsꞌinki nonte, la itsjé chjasin tso̱kjinta la ko tsꞌixité sin tso̱nínkaon sin. Kjánchó tíha la na̱ntá tsoxrankíxixón ti kjuatjoté.

Kjánchó ticháxi̱n tsihin kaín chojni siín kaín nación ti itan jína tsaáxin sin.

Kixin nchónhña chojni itsi tsondáchro sin kixin jehe sin mé ti Cristo. Ndá xi̱kaha sichꞌiyehe sin itsjé chojni.

*’Tóxakohanra jahara kixin tsjikaánra sin nkayakon ti sin tꞌe̱to̱an, la nkaxehen ni̱nko tsjatíaxínra sin. La ticháxi̱n tso̱chjinara ti tjejó ti sin gobernador la ko ti sin rey kixin tinkachónkira ti janhan; ndá ntiha la tsjachara tso̱chro̱nkara ti itan kuénta̱na nkayakon sin.

Kixin itsi chojni tsondáchro kixin jehe sin mé ti Cristo la ko kja̱xin itsi chojni nduáhya tsjako la tsjasin sin kjuaxroan ijié kixin sichꞌiyexín sin kjónté ti sin tsíkjeyá Díos.

*’A̱ndá ti ña̱o a ti ó tsꞌatsínka ti kjuachrakon la ti ña̱o la í tsꞌinkaséñaxínhña la ti nitjó la í tsjajonhña xrohi. *Ti konotsé la tsꞌánótje̱xi̱n nka̱jní la ti kjuachaxin siín nka̱jní la tsꞌinki.