Popular Bible Verses from PA’PUDIAN 119

Share

Iatu kadamMi sitinti palita diong to’ lentekku, sia butung bia’ unnarrang lalanku.

Iatu kadamMi kuanna rara’ lan batu ba’tengku, dikua da angku kasalan mati’ Kalemi.

Umba la nakua ungkaritutui gau’na tu to mangura anna masero? Iapi ke nakaritutui susitu kadamMi.

Maupa’ mintu’ to unnanna rara’i tu kasa’bianNa, sia to kalebu tallang penaanna undaka’ Puang.

Kamumo tu pentirerungangku sia balulang toto’ku, kurannuan tu kadamMi.

Benna’ tangnga’ kinaa, angku karitutui tu sukaran alukMi, sia angku kanannangi situang penaa kalebungku.

Pamalang lakoi kasa’biamMi tu penaangku, sia da Mipalulakoi ianan bu’tu kadake.

Melo duka sia angku mangkamo narua parri’, kumua angku ma’din umpelada’i tu mintu’ apa Mipondok.

iamote tu pa’pakatana lako kaleku lan kamandasangku, kumua napatuomo’ pangallu’Mi.

Pate’tena’ unnola lalan pepasanMi, belanna iamo pa’poraiangku.

O, PUANG ada’ina’ tu lalan aluk Mipondok, angku karitutui landa’ lako ma’katampakanna.

Bonnong tu penaangku napobua’ rosso inaa, pabantangna’ susitu kadamMi.

Lendu’ kukamali’na tu sukaran alukMi! Kiallo-kiallo kunannung bang.