Popular Bible Verses from Yohanis 1

Share

Leo mae talo naa, tehuu basa hatahorir mana simbok ma ramahere neun, Ana fee sara haak fo dadi reu Manetualain anan nara.

Makasososan, Manetualain Dedeꞌa-kokolan hambun ena. Manetualain Dedeꞌa-kokolan naa, ndia Hatahori esa. Hatahori naa, sama-sama no Manetualain. Ma Ndia oo, ndia Manetualain boe.

Manggaledok naa, saꞌan tora maso neni makiuk neu; ma makiuk ta bisa nakatataka nala Manggaledok naa. Huu Manggaledok naa, nasaꞌa nakandoo.

De ‘Manetualain Dedeꞌa-kokolan’ naa oo, neni bonggik dadi neu hatahori dae-bafok boe. Ana nasoda nai ita taladan. Ita mete-tita Ndia ta neni babanggan. Ndia ta neni babanggak talo naa, nahuu Ndia naa, Manetualain Ana kise muꞌen. Ana hii natudu Ndia dale susuen neu ita, nahuu Ndia hada-tataon memak leo naak. Ma basa hata fo Ana kokolak laꞌe-neu Manetualain, memak tetebes.

Manetualain nakadadadik basa-basan, pake Ndia Dedeꞌa-kokolan naa. Ta hambu buas esa dadi boe na, mete ma Hatahori naa ta adu sana. Ndia naa, masodak oka-huun. Dadi hatahori mana hambu masodak tetebes, ara rasoda numa Ndia mai. Ana oo sama leo Manggaledok mana masaꞌak boe, fo hatahori mana leo-laꞌo nai Manggaledok naa, bisa mete-nita ma nalela.

Neu beꞌe-mai, boe ma Yohanis mete-nita Yesus laꞌok neni ndia mai. De ana kokolak nae, “Mete neu Hatahori manai naa dei! Ndia naa, Manetualain Bibi lombo Anan mana dadi tunu-hotuk fo koka heni hatahorir marai dae-bafok ia sala-singgon nara.

Leo mae Ana nakadadadik basa-basan manai dae-bafok ia ena, tehuu hatahorir marai dae-bafok ia ta ralela sana, neu Ana mai leo nai ia. Leo mae Ana mai leo no Ndia hatahori heli-helin nara, tehuu ara ta nau simbok kana.

Hatahori fo mana dadi Manggaledok tetebes naa nae neni dae-bafok ia mai. Manggaledok naa, tao nala basa hatahorir mete-rita basa hata fo tetebes sara.

Lele uluk, baꞌi Musa ndia nakonda Manetualain Hohoro-lalanen neu ita bei-baꞌin nara. Tehuu hatematak ia Hatahori naa, ndia Yesus Karistus, ndia natudu Manetualain dale susuen neu ita. Ma basa hata fo Ana kokolak laꞌe-neu Manetualain, memak tetebes.