Popular Bible Verses from Wá‘iz 5

Share

Bolne meṉ jaldbází na kar, aur terá dil jaldbází se Ḳhudá ke huzúr kuchh na kahe; kyúṉki Ḳhudá ásmán par hai, aur tú zamín par; is liye terí báteṉ muḳhtasar hoṉ.

Níz har ek ádmí, jise Ḳhudá ne mál o asbáb baḳhshá, aur use taufíq dí ki us meṉ se kháe, aur apná baḳhra le, aur apní mihnat se shádmán rahe; yih to Ḳhudá kí baḳhshish hai.

Zardost rupaye se ásúda na hogá; aur daulat ká cháhnewálá us ke baṛhne se ser na hogá. Yih bhí butlán hai.

Jab tú Ḳhudá ke ghar ko játá hai, to sanjídagí se qadam rakh; kyúṉki shanawá hone ke liye jáná ahmaqoṉ ke se zabíhe guzránne se bihtar hai; is liye ki wuh nahíṉ samajhte ki badí karte haiṉ.

Jab tú Ḳhudá ke liye mannat máne, to us ke adá karne meṉ der na kar; kyúṉki wuh ahmaqoṉ se ḳhush nahíṉ hai; tú apní mannat ko púrá kar.

Terá mannat na mánná is se bihtar hai, ki tú mannat máne aur adá na kare.

Mihnatí kí níṉd míṭhí hai, ḳhwáh wuh thoṛá kháe, ḳhwáh bahut; lekin daulat kí firáwání daulatmand ko sone nahíṉ detí.

Jis tarah se wuh apní máṉ ke peṭ se niklá, usí tarah naṉgá, jaisá ki áyá thá, phir jáegá; aur apní mihnat kí ujrat meṉ kuchh na páegá, jise wuh apne háth meṉ le jáe.