Popular Bible Verses from Yaxayas 60

Share

Lub nroog Yeluxalees, cia li sawv, vim qhov kaj twb los rau koj, thiab tus TSWV lub tshwjchim ci ntsa iab los rau saum koj lawm.

Txhua haivneeg yuav los rau hauv koj txojkev kaj, thiab tej vajntxwv yuav los rau hauv tus duab tshav ntuj uas nyuam qhuav tawm hnub tshiab.

Kev tsaus ntuj roos tagnrho lub ntiajteb, thiab kev tsaus ntuj dub nciab npog txhua haivneeg, tiamsis tus TSWV yuav ua qhov kaj los rau koj pom kev, thiab luag yuav pom nws lub tshwjchim uas ci ntsa iab saum koj.

Tsevneeg uas tsawg yuav dhau mus ua ib xeem, thiab xeem uas tsawg yuav dhau mus ua ib haivneeg uas muaj hwjchim; Kuv yog tus TSWV, kuv yuav ua kom tej no muaj los sai sai ntag.”

“Nruab hnub lub hnub yuav tsis ci rau koj, lossis hmo ntuj lub hli yuav tsis ci rau koj lawm thiab; Tiamsis kuv uas yog koj tus TSWV yuav ci kaj nrig rau koj mus ibtxhis, kuv lub tshwjchim yuav ci ntsa iab rau saum koj.

Koj lub hnub yuav tsis poob qho, thiab koj lub hli yuav tsis tsaus ntxiv lawm. Vim tus TSWV yuav ua lub teeb ci rau koj pom kev mus ibtxhis, thiab koj tej kev nyuaj siab twb yuav xaus.

Thaum koj pom tej no koj yuav zoo siab kawg li. Koj lub siab yuav tshee hnyo thiab zoo siab kawg nkaus. Lawv yuav nqa lwm haivneeg tej nyiaj los rau koj; tej nyiaj thiab txhua yam yuav hla hiavtxwv los cuag koj.

Cia li tsa qhovmuag saib ibncig koj thiab ntsia tej uas tabtom tshwmsim los: Koj haivneeg tabtom sib sau ua ke yuav rov los tsev! Koj cov tub yuav taug kev deb rov los. Luag yuav puag koj cov ntxhais ib yam li puag menyuam los.

Koj haivneeg yuav ua ncaj; lawv yuav tau lub tebchaws los ua lawv tug mus ibtxhis. Kuv tsim lawv, kuv cog lawv, kom lawv qhia kuv lub hwjchim rau sawvdaws.

Neeg yuav tsis hnov tej suab sib ntaus sib tua nyob hauv koj lub tebchaws; koj lub tebchaws yuav tsis raug kev puastsuaj ntxiv lawm. Tiamsis kuv yuav tiv thaiv koj ib yam li tus ntsa yeej, koj yuav qhuas kuv rau qhov kuv twb pab koj dim lawm.

Koj tej roojvag yuav qhib tas hnub tas hmo, kom txhua haivneeg tej vajntxwv thiaj tau kev coj lawv tej nyiaj tuaj rau koj.

Yuav muaj ntau pab ntxhuav los tim tebchaws Midias thiab lub nroog Efas los nyob puv nkaus hauv koj lub tebchaws. Cov ntxhuav ntawd yuav thauj kub thiab tshuaj tsw qab hauv tebchaws Senpas tuaj rau koj. Neeg yuav piav txog txoj xov zoo uas tus TSWV tau ua lawm rau sawvdaws mloog.

Tus TSWV hais rau lub nroog Yeluxalees hais tias, “Cov neeg txawv tebchaws yuav puab koj tej ntsa yeej, thiab lawv cov vajntxwv yuav ua koj cov tubtxib; vim kuv chim, kuv thiaj rau txim rau koj, tiamsis vim kuv hmov tshua koj, kuv thiaj hlub koj.

“Luag yuav tsis ntxub koj lossis tso koj tseg ua lub nroog uas nyob lwj siab thiab qhuav nquas cia ib zaug li lawm. Kuv yuav ua kom koj vammeej thiab zoo nkauj, koj yuav yog qhov chaw uas neeg nyob kaj siab lug mus ibtxhis.

Txhua haivneeg thiab tej vajntxwv yuav yug koj ib yam li leej niam pub mis rau nws tus menyuam. Koj yuav paub hais tias kuv yog tus TSWV tus uas cawm koj dim, thiab kuv yog cov Yixalayees tus Vajtswv tus uas muaj hwjchim loj kawg nkaus pab koj dim.