Popular Bible Verses from Yaxayas 41

Share

Tsis txhob ntshai, rauqhov Kuv yeej nrognraim nej! Kuv yog nej tus Vajtswv, mas nej tsis txhob poobsiab! Kuv yuav txhawb kom nej muajzog thiab pab nej; Kuv sab tes xis uas muajyeej yuav puag rawv nej.

Kuv yog tus TSWV, uas yog nej tus Vajtswv; Kuv yeej tuav rawv nej sab tes xis thiab hais rau nej tias, ‘Tsis txhob ntshai, Kuv yuav pab nej.’ ”

“Cov neeg uas chim rau nej, lawv yuav swb thiab raug txajmuag. Cov neeg uas tawmtsam nej, yuav puastsuaj thiab tuag tas.

Kuv coj nej tawm tim qabntuj kawg los, Kuv hu nej tim plaub cegkaum ntuj uas deb kawg nkaus los, thiab hais rau nej tias, ‘Nej yog Kuv cov tubtxib.’ Kuv twb xaiv nej lawm, thiab yuav tsis tso nej tseg ib zaug li.

Txawm nej mus nrhiav cov yeebncuab uas tawmtsam nej, los nej yuav tsis ntsib. Cov uas uarog rau nej los yuav puastsuaj thiab tuag tas.

Tus TSWV hais tias, “Cov Yixalayees, txawm yog nej zoo li tus nyuag cab liab uas me-me thiab tsis muajzog, los nej tsis txhob ntshai; Kuv yuav pab nej. Kuv yog cov Yixalayees tus Vajtswv uas dawbhuv, Kuv yog tus yuav cawm nej.

“Tiamsis Yixalayees, nej yog Kuv cov tubtxib, nej yog haivneeg uas Kuv tau xaiv tseg, yog Kuv tus phoojywg Anplahas li cajces.

Kuv yuav ua kom muaj dej txhawv saum tej roob qhua, thiab ua kom dej txhawv ntws nto hauv tej hav. Kuv yuav ua kom tej tiaj suabpuam muaj pas dej txhua qhov thiab ua kom muaj dej txhawv hauv tej av qhuav los.

“Thaum Kuv haivneeg uas pluag thiab txomnyem tuaj nrhiav dej haus, thaum lawv nqhis dej ua rau qa qhuav tas lawm, thaum ntawd Kuv, uas yog tus TSWV yuav teb lawv tej lus thov; Kuv, uas yog cov Yixalayees tus Vajtswv, yuav tsis tso lawv tseg ib zaug li.

Leejtwg yog tus ua kom muaj tej xwm no tshwmsim tuaj? Leejtwg yog tus uas teev caijnyoog keebkwm thaum ub los? Kuv, uas yog tus TSWV, yog tus nyob thaum chivkeeb los, thiab Kuv, yog tus uas yuav nyob thaum kawg.

Kuv yuav ua kom ntoo thuv, ntoo kubtwg, ntoo tswqab, thiab ntoo-roj, tuaj taus saum tej mojsab qhua. Kuv yuav ua kom tiaj suabpuam ciaj zoov nujtxeeg, ntoo thuv, ntoo ciab, thiab ntoo thwjsuab yuav puv lub zoov ntawd. Neeg yuav pom thiab paub tias Kuv, uas yog tus TSWV, yog tus ua tej no. Lawv thiaj yuav paub tias haivneeg Yixalayees tus Vajtswv dawbhuv yog tus uas ua kom muaj tej no.”