Popular Bible Verses from Henplais 11

Share

Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhovmuag tsis pom. Twb yog vim cov neeg txheej thaum ub ntseeg lawv thiaj ua tau haum Vajtswv siab.

Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv.

Twb yog vim peb ntseeg peb thiaj totaub hais tias thaum Vajtswv tsim ntuj tsim teb Vajtswv hais kom muaj, txawm cia li muaj tiag. Yog li ntawd tej uas peb qhovmuag pom yeej los ntawm tej uas peb qhovmuag tsis pom los.

Twb yog vim Anplahas ntseeg, thaum Vajtswv kom Anplahas tawm mus nyob lub tebchaws uas Vajtswv coglus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub tebchaws mus, tiamsis nws tsis paub hais tias xyov nws yuav mus qhov twg. Twb yog vim Anplahas ntseeg, Anplahas thiaj tau mus nyob lub tebchaws uas Vajtswv coglus tseg hais tias Vajtswv yuav muab pub rau nws nyob. Anplahas nyob hauv tsevntaub ib yam li nws yog tus neeg uas tsis muaj tebchaws nyob. Tom qab ntawd Ixaj thiab Yakhauj nyob hauv tsevntaub ib yam li nkawd yawg Anplahas. Vajtswv coglus tseg rau nkawd ib yam li coglus rau Anplahas.

Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwmtxheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag. Vajtswv ua li ntawd twb yog nws rau txim rau tej neeg uas tsis ntseeg. Vim Nau-es ntseeg, Vajtswv thiaj suav hais tias Nau-es yog tus uas ncaj ncees.

Twb yog vim Enauj ntseeg, Enauj thiaj tsis tuag. Vajtswv coj nws mus thiaj tsis muaj leejtwg nrhiav tau nws, rau qhov Vajtswv twb coj nws mus lawm. Vajtswv txojlus hais tias, “Thaum Vajtswv tseem tsis tau coj Enauj mus, Enauj yeej ua haum Vajtswv siab.”

Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab. Txawm yog Anpees twb tuag lawm los nimno nws kev ntseeg tseem niaj hnub qhia peb.

Twb yog vim Anplahas ntseeg, Anplahas thiaj muaj tub muaj ki. Txawm yog nws laus heev thiab Xalas ibtxwm xeeb tsis taus tub los nws cia siab hais tias Vajtswv yeej yuav ua raws li Vajtswv tej lus cog tseg.

Anplahas nyob li ntawd, rau qhov nws tabtom tos hnub uas Vajtswv coj nws mus hauv lub nroog uas nyob mus ibtxhis, lub nroog ntawd Vajtswv yog tus uas muab qauv thiab ua lub nroog ntawd.

Twb yog vim Mauxes ntseeg, thaum nws hlob lawm nws tsis pub sawvdaws hu hais tias nws yog Falaus tus ntxhais tus tub. Nws txaus siab nrog Vajtswv haivneeg raug kev txomnyem; nws hais tias nws ua li ntawd zoo dua li nws yuav mus ua tej kev phem kev qias uas nyob ib nyuag ntu xwb. Nws ntseeg hais tias Vajtswv yuav txib tus Mexiyas los pab Vajtswv haivneeg. Txawm yog tej uas nws ntseeg li ntawd ua rau luag thuam nws los nws pom hais tias qhov ntawd muaj nqis heev dua txhua tsav yam zoo uas nyob hauv tebchaws Iziv, rau qhov nws saib ntsoov tej uas yav tom ntej Vajtswv yuav muab rau nws. Twb yog vim Mauxes ntseeg, Mauxes thiaj tawm hauv tebchaws Iziv mus. Txawm yog vajntxwv chim rau nws los nws tsis ntshai. Nws tsis rov qab los, rau qhov nws ntseeg cuag li uas nws lub qhovmuag twb pom Vajtswv tus uas sawvdaws qhovmuag tsis pom ntag.

Twb yog vim Anplahas ntseeg, Anplahas thiaj coj nws tus tub Ixaj mus yuav muab tua fij rau Vajtswv. Thaum ntawd twb yog Vajtswv sim Anplahas siab. Txawm yog Vajtswv coglus tseg rau Anplahas lawm los Anplahas tseem zoo siab muab nws tib leeg tub coj mus tua fij rau Vajtswv thiab.

Twb yog vim tus niamntiav uas hu ua Lahaj ntseeg nws thiaj dim. Nws tsis nrog cov neeg uas tsis mloog Vajtswv lus raug kev puastsuaj, rau qhov nws hu ob tug soj tebchaws los hauv nws tsev thiab pab nkawd.

Twb yog vim cov Yixalayees ntseeg, lawv cia li mus hauv hiavtxwv liab ib yam li lawv mus saum nruab nqhuab. Tiamsis thaum cov Iziv uas raws lawv qab mus hauv, dej cia li nphau los npog cov neeg Iziv tuag tas huv tibsi.

Twb yog vim cov Yixalayees ntseeg, thaum lawv mus ncig lub nroog Yelikaus xya hnub lawm, lub nroog ntawd tej ntsa yeej txawm vau tas huv tibsi.

Twb yog vim Mauxes ntseeg, Mauxes thiaj ua kevcai Hla Dhau thiab kom sawvdaws muab ntshav pleev qhovrooj. Lawv ua li ntawd tus timtswv uas yog txojkev tuag thiaj tsis tua cov Yixalayees cov tub hlob.

Twb yog vim Yauxej ntseeg, thaum Yauxej yuav tuag nws thiaj hais txog zaj uas cov Yixalayees yuav tawm hauv tebchaws Iziv mus. Thiab nws qhia qhov chaw uas nws kom lawv coj nws lub cev mus faus cia.

Twb yog vim Yakhauj ntseeg, thaum Yakhauj yuav tuag nws thiaj foom koob hmoov rau Yauxej ob tug tub. Thaum Yakhauj pehawm Vajtswv, Yakhauj muab nws tus pas nrig los txheem nws lub cev, rau qhov nws laus heev lawm.

Twb yog vim Ixaj ntseeg, Ixaj thiaj foom koob hmoov rau Yakhauj thiab Exaus. Ixaj qhia tej xwmtxheej uas yuav muaj los yav tom ntej rau nkawd.