Popular Bible Verses from Gálatas 5

Share

Pero atoq jun ukꞌuan rukꞌaslen roma ri Espíritu Santo, kereꞌ ndiqꞌalajin pa rukꞌaslen: Ndojowan, ndikikot, kꞌo uxlanen pa ránima, ma ndikꞌo ta rukꞌuꞌx ndiroyobꞌej jun achike, utz runoꞌoj chake ri wineq, utz ndubꞌen chake ri wineq, kin ndubꞌen ri ndubꞌij, loqꞌ ránima y nditiker nduqꞌet ri ru-cuerpo chuwech ri itzel teq rayinik. Si keriꞌ ri ikꞌaslen ndikꞌuaj, nixta jun ley ri xtubꞌij chiwij chi ma utz ta ri ngixtajin rikꞌin.

Romariꞌ nibꞌij chiwa: Tiyaꞌ qꞌij chare ri Espíritu Santo chi ndukꞌuaj ri ikꞌaslen, y keriꞌ ma ndiyaꞌ ta qꞌij chare ri itzel teq rayinik chin ri i-cuerpo chi ndikikꞌuaj ri ikꞌaslen.

Y roma ja ri Espíritu Santo yoyon kꞌakꞌakꞌ qakꞌaslen, tiqayaꞌ qꞌij chare chi tukꞌuaj chuqaꞌ ri qakꞌaslen.

Porque ri erichin ri Cristo Jesús, xeken yan chuwech ri itzel teq rayinik chin ri ki-cuerpo, y xa achel ta kibꞌajin ri itzel teq rayinik riꞌ chuwech cruz, chin ma ndukꞌuꞌex chi ta ri kikꞌaslen roma ri itzel teq rayinik riꞌ.

Y kin qꞌalej wi ri ukꞌuan kikꞌaslen roma ri itzel teq rayinik chin ri cuerpo, roma kereꞌ ngekibꞌanalaꞌ: Ndikikꞌamalaꞌ qa kiꞌ xa achoq na ikꞌin chin ndikibꞌen mak, kijachon kiꞌ pa ruqꞌaꞌ nojel ruwech mak, ma ndikiqꞌet ta kiꞌ ngekibꞌanalaꞌ mak ri santienta kꞌix ndukꞌen pe, ngekiyalaꞌ kiqꞌij tiox, ngekibꞌanalaꞌ kiqꞌij wineq, jumul kiyakon itzel teq achike pa kánima chirij jun chik, xe oyowal koma, ndiququt kánima chikij wineq, kin chaꞌanin paqiꞌ ndipuꞌun koyowal, xe ri kꞌo utz ndukꞌen pe chake ndikibꞌen, ejachoy kiwech wineq, ndikoqaj tijonik ri ma junan ta rubꞌeyal rikꞌin ri qetzij. Itzel ndikinaꞌ chare roma utz kibꞌanun chꞌaqa chik, ndikiqꞌabꞌarisaj kiꞌ, ndikibꞌen nimaqꞌij ri apeꞌ apux teq achike ngekibꞌanalaꞌ, y ngekibꞌanalaꞌ chꞌaqa chik itzel teq achike achel re ngojtajin chubꞌixik. Y riyin nikamuluj rubꞌixik ri nubꞌiꞌin kan chiwa xe pa nabꞌey, chi ri ngebꞌanun itzel teq achike achel ri kꞌaja ok xqabꞌij, ma ngeꞌok ta chupan ri ru-reino ri Dios.

Rix hermanos, rix oyon roma ri Dios chin xixel libres, pero ma roma ta rix libres, utz ta chi ndibꞌanalaꞌ ri itzel teq rayinik chin ri i-cuerpo. Pa rukꞌexel riꞌ, titolaꞌ iwiꞌ chiwech roma ndiwojoꞌ iwiꞌ.

Porque ri itzel teq rayinik chin ri cuerpo, ma ndikajoꞌ ta ndikiyaꞌ qꞌij chare ri Espíritu Santo chi ndukꞌuaj ri ikꞌaslen y ri Espíritu Santo ma ndirajoꞌ ta nduyaꞌ qꞌij chare ri itzel teq rayinik chi ndikikꞌuaj ri ikꞌaslen. Ri ekaꞌiꞌ riꞌ ma ndikikꞌuaj ta kiꞌ, y romariꞌ rix ma ngixtiker ta ndibꞌen nojel ri ndirayij ndibꞌen.

Porque ri ley xyoꞌox chare ri Moisés, ndubꞌij: Kaꞌawojoꞌ ri wineq achel ndawojoꞌ awiꞌ rat. Keriꞌ ndubꞌij ri ley. Y si rat ndanimaj re jun mandamiento reꞌ, kin ndabꞌen nojel ri ndubꞌij chupan ri ley.

Ma tiqanimrisalaꞌ qiꞌ, ma tiqabꞌanalaꞌ oyowal chiqawech, y ma itzel tiqanaꞌ chare roma utz kibꞌanun chꞌaqa chik chiqakajal.

Ri Cristo xojrelesaj chuxeꞌ ruchuqꞌaꞌ ri ley xyoꞌox chare ri Moisés chin xojel libre. Roma kꞌa riꞌ, kaw kixpeꞌeꞌ chupan ri libertad riꞌ, y ma tiyaꞌ chik iwiꞌ chuxeꞌ ruchuqꞌaꞌ ri ley riꞌ.