Popular Bible Verses from wandījo 39

Share

Alīyo ū SEEBA walī hamò nang'hwe ū Yosefu, na lūūlū ūng'wīlūkīla ningī no aho alī ū mu kaya ya ng'wa ise būgonzo, ū muna Misili ng'wenūyo.

Na lūūlū ī shikolo īsho walī nasho ūshileka pye mu makono ga ng'wa Yosefu; na kūlwa nguno ya ng'wa Yosefu, ū wei ooya gete ū kwikala akūkoya koyaga na shikolo shose shose a ha kaya yakwe, ūlū ītī shilīwa dūhū īsho walyaga. Gwike ū wei ū Yosefu walī n'ihanga isoga ū kūlola.

Na lūūlū ū ntaale wa jeela ūntūūla ū Yosefu kūbiza higūlya yabo pye a bafungwa abo baalīmo ū mu jeela yenīyo; nī mihayo ī yīngī īyo yalī yigelile kwītwa ū mu jeela, wītūūla ha sīlīlī ya ng'wa Yosefu.

Ūnsola ū Yosefu ūmponya mu jeela, ūmo balugalīlagwa batūmami ba ntemi; wikala mo ng'hana ū mu jeela yenīyo. Alīyo ū SEEBA walī hamò nang'hwe ū Yosefu, ūng'wītīla yawiza no; ūng'wīta kūbiza wa kūyegelwa ū kū būtongi bo ntaale wa jeela.

Hūna lūūlū aho jabīta shikū akūtūmamaga hoi, ū nke wa ng'wa ise būgonzo ūng'wikūmva; ūng'wīla, “Nzūgū ūlaale nane.” Alīyo akalema no, ūng'wīla gīkī, “Ū nene ū mu kaya yenīyī nalī ntaale, ū baba būgonzo atakoyakoyelaga shose shose īsho shilī mu kaya īyī; būlī shikolo shakwe ashitūūlile mu nkono gwane. Ū mu kaya yenīyī atīho ntaale kūniheeba ū nene; na shitīho shikolo īsho anilemegije ū baba būgonzo ū mu numba īyī, ūlū ītī beebe iyene; nguno ū bebe ūlī nke wakwe. Na lūūlū nakūdūla ginehe ū kūng'wītīla shibi ū Mulungu ū mu mhayo gwa malofu gwenūyū?”

Na lūūlū lwise lūmò ū Yosefu wingīla ū mu kaya gīkī akabeeje milīmo yakwe īyo wītaga na kale, pye a batūmami a bangī baalī batīmo ū mu kaya. Ū nkīma ng'wenūyo ūndima ū Yosefu ī ligoodi lyakwe; ūng'wīla, “Nzūūgū ūlaale nane!” Alīyo wihuluguma, ūnekela ī ligoodi mu nkono gwakwe; ū wei ūpuluka hanze ūpeela.