Popular Bible Verses from Matiye 6

Share

Zelete mə Meghea Shala ba'a nza tiɗiɗi kaba. Kateve ŋayɛ pɛtɛa wəshi nyi ketene Shala kadzeghə.

Mba yɛ kedambeghə ŋayɛ kaheha yitea hendɛ, hendɛ nde ɗepe ghəa ŋkɛ. Wərə heha nya ɓeshi kaŋa veci nya ɓeshi.

Vatse gɛ, ma 'ya sha gheyɛ: mba yɛ keheha yitea wəshi kezeme ta ŋayɛ ba'a wəshi nyi tesa yɛ, lekwesa nyi teseɗe yɛ. Za ma mpi ke wəsə kezeme, za ma geva ke lekwesa wəka?

Ma keɗe na kasəkwə Shala ne, dzembe cɛa ŋa, ŋzlete ŋkwa, səkwə Shala Yiteyɛ ŋa nya mbe cɛa shɛ. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

Wa nya tsetse səkwə ghə yɛ: Yiteyɛa n'yɛ nya pelɛ ghweme, hawe mbeli va ganyɛa sləa ŋa, Sawa Meghea ŋa, mene wəshi nyi ɗe na mbeli nyi te hɛɗi kala nya mene mbeli nyi pelɛ ghweme.

Ɗave n'yɛ wəsə kezeme behe n'yɛ ve ɓeshi.

Kelemte ghena bezemte ŋa n'yɛ te wənə, kala nya kelemte nda n'yɛ ke mbeli nyi kebezemte n'yɛ ghena.

Kelema n'yɛ na kadzete ŋkwa kedzeghe ŋkwa ma, ama yakɛ n'yɛ va Nde ghwete ŋkwa, kwa nza ŋkɛ, ŋa ŋa meghe, berete, ba'a zləvə, kaghala ghala. Amɛn.

Kwa nza ŋkɛ ma kekelemte ghena nyi bezemte ŋayɛ kweci mbeli yɛ te wənə ne, katekelemte ŋa ŋayɛ Yiteyɛ ŋayɛ nya pelɛ ghweme te wənə perə.

Newe mə 'yɛ nyi kezlə yitea ghweme, katsawe wəshi kezeme hɛ we, kamene wəshi hɛ te wəve we, katsene hɛ kadzawa tame we, ama Yiteyɛ ŋayɛ nya pelɛ ghweme nde zeme nda wəshi kezeme ke hɛ. Ŋkwini zhigə nza zləvəa ŋayɛ za ma ke 'yɛ wa?

Tsenema mcɛlə yɛ kwake te hɛɗi, te ŋkwa nya beze hɛ yɛ lema ba'a dene, ŋkwa nya belaŋe gelembe ka ghərəa kɛfi kezha fə hɛ ma. Tsene mə mcɛləa ŋayɛ pelɛ ghweme, te ŋkwa nya ɗema yɛ lema ba'a dene kezha beze hɛ, ya ka ghərəa kɛfi kezha belaŋe gelembe ba'a kezha fə hɛ. Kwa nza ŋkɛ ne, te ŋkwa nya nza yɛ mcɛləa ŋa tenza mehele ta ŋa shanda.

Wəndə shɛ kamenete nda slene ke ka sleke ŋkwa bake we, kateɗema ghena ta kwete ŋkɛ, kateɗe ŋa kwete ŋkɛ. Katenza ŋkɛ dɛŋe dɛŋe te kwete, kateɓelama ghena ta kwete ŋkɛ. Kapesle yɛ yitea mene nda slene ke Shala ba'a ke cɛdɛ kanya kwetɛŋe we.

Mbe seɗe nda lekwesa Shala ke gwəzə nya kenza megela ɓeshi ne, hendɛ mbe ghwə ŋkɛ, ashɛ ŋkɛ kateseɗe ŋayɛ lekwesa za ma ke hɛ wəka? Dewə ndeke nda ghə yɛ ke Shala deŋwa.

Ma kenza na kakemane ka titikwəa kɛfi ne, ncɛ nda ma na ya ke mcɛ ŋa kwa sla pela ŋkɛ ma. Tsagha ne, tewəfərə wəsə nya ndeke nda na. Nahe Shala, Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.

Ntsehwele mə yitea tserame wəshi nyi 'yɛwe Shala va gheyɛ kwa kema ta mbeli kezha tsagha ŋayɛ mbeli pɛtɛ. Ma kenza nde tsetse mene yɛ ne, katekemave zhɛme yɛ va Yiteyɛ ŋayɛ nya pelɛ ghweme we.

Ma kenza yɛ kamene səwəmayɛ, nzama yɛ le kema teheɗe kala mbeli nyi shewə ma, tsagha mene ka mbəɗəkwə, pa hɛ zhɛrete kema tɛarawe rawe kezha ɗepe pɛtɛa mbeli səwəmayɛ yamene hɛ. Kaganda ne, ma 'ya sha gheyɛ: nahe hɛ kekemave zhɛme ta nci tsetsenya. Ama gha, kenza na kamene səwəmayɛ ne, pɛkɛ kema ta ŋa, slaɗete ghəa ŋa, yitea ɗepema mbeli səwəmayɛ yamene na. Nahe Yiteyɛ ŋa kenakɛ pɛtɛa wəshi nyi mene na tewəfərə, kateve ŋa zhɛme ŋkɛ.