Popular Bible Verses from مَرکاس 16

Share

گۆن آیان گوَشتی: ”دنیائے سجّهێن کئومانی کِرّا برئوێت و وشّێن مِستاگا سر کنێت.

باوَرمندان اے نشانی گۆنَ بنت: منی نامئے سرا مردمانی جِنّانَ کَشَّنت، نۆکێن زبانان هبرَ کننت، ماران په دستَ گرنت و اگن زَهر هم بوَرنت، آیان هچّ پرواهَ نبیت. نادراهان دست پِرَ مُشنت و آ وشّ و دْراهَ بنت.“

هرکَس که ایمانَ کاریت و پاکشۆدیَ کنت، آ رَکّیت. بله کَسے که ایمانَ نئیاریت، مئیاریگَ بیت.

ایسّائے مُرید، په آییئے مِستاگئے شِنگ و تالان کنگا هر جاهَ شتنت و هُداوند هم آیانی همراه اَت. هُداوندا گۆن بازێن مۆجزه و اَجَبَّتێن نشانیان وتی هبرانی بَرهَکّی سابتَ کرت.

وَرنایا گوَشت: ”متُرسێت، شما ایسّا ناسِریئے شۆهازا اێت که سَلیب کَشّگ بوتگ. آ زندگ بوتگ و جاهی جتگ. نون اِدا نه‌اِنت. بچارێت، اے هما جاگه اِنت که اِدا آییئے جۆن اێر اَت.

بله وهدے چمِّش چست کرتنت، دیستِش که ڈۆک لێٹێنگ بوتگ. ڈۆک سکّ مزن اَت. کَبرا که پُترتنت، دیستِش که راستێن نێمگا ورناے نِشتگ و اِسپێتێن کباهے گْوَرا اِنتی. هُشک و هئیران بوتنت.