Popular Bible Verses from Romanos 2

Share

Hamẽ matunã, tsuabũra txakabuwariaibu uĩkĩ mã hatu kũyã akatsis imisburã, matũri habiaskari txakabu mã ariamiswẽ taeshũ unãtã Deusũ matu kupishanai: “Ẽ pashatiruki”, ikĩ xinãyamakubaĩkãwẽ. Hakia Deus pepahaira mã danãbiaya matũ txakabu tanabiakubaĩkĩ hau ana ha xinãma Deusũ buanũ tsuabura hakiri kakĩ xinã betsa watã mã yukashanũbũ matu xinaĩ matuwẽ nuikĩ hatiãra mã hakiri yukashanai hĩ hĩ ikama Deusũ manakubainikiki.

Haska txakabu tibiwẽ yura betsabu ikai tsuãra uĩtã xinãkĩ ha akĩ txitenũ ishũ mã amis kasmai mã atirurã, habias txakabu mã haya matũmebi mã daketapatirubuki. Habiaska tibi habubetã mã abiamiswẽ taearã, haskawẽ taeshũ shanẽ ibu bebũshũ matu txiteaibu mã hawa nematirubumaki.

Hanushũ Deusũ hatu shabakabi unãti wakinã, yurabu txakabu inũ pepabu dasibi uĩmisshũ habias xinãwẽ besti hatu unãti wakĩ kanetirumaki.

Ha inũ, tsuabũra hawẽ hãtxa nĩka bestikĩ Deus benimawatirubumaki, hawa txibãmarã. Hakia tsuabũra hawẽ hãtxa yununi nĩkatã habias txibãkubaĩmisbu hatuwẽ benimakĩ hatũ txakabu ana xinãma Deusũ hatukiri pe xinãshanikiki.

Haska yurabu tibi hiweshũ amisbuwẽ taeshũ Deusũ hatu kupiakeakeashanai matu yuinũ nĩkairakãwẽ.

Hamẽ yura betsa pubeĩ sinatai ha irabenamekĩ Deusũ hãtxa txanima danãkĩ ha txibãma txakabu betsa betsapa wakubaĩmisbu habuki Deus sinatakĩ kupishanikiki.

Haska inũ, mã hatiritũ txakabu betsa betsapa akĩ henekatsi ikama Deus xinãma txakabu ibubis matsãkeakebaĩkĩ Deus sinatamamisbuwẽ taeshũ yurabu dasibi unãti washanaitiã ana manama Deusũ matu kupishanikiki.