Popular Bible Verses from Luka 9

Share

Kandi yaagambira boona ati: Omuntu weena oraayende kunkuratira, ayeyangise, ayekorere omusharaba gwe obutoosha, ankuratire.

Ahakuba omuntu weena orikwenda kukiza amagara ge aryagabuza; kandi orikubuza amagara ge ahabwangye, aryagakiza.

Yesu yaamugarukamu ati: Tihariho muntu ovuga ekyoma ekirikuhinga, akareeba enyima, oshemereire obukama bwa Ruhanga.

Mbwenu omuntu kiryamugasira ki okutunga ensi yoona, akahwerekyerera, nari akaferwa amagara ge?

Umanye ngu omuntu weena orikwitwa enshoni ahabwangye n'ahabw'ebigambo byangye, n'Omwana w'omuntu nawe aryaitwa enshoni ahabwe, ku ariizira omu kitiinisa kye, n'omu kitiinisa kya Ishe n'ekya baamaraika abarikwera.

Yesu yaamugambira ati: Zaamuha ziine ebiina, n'enyonyi z'omu mwanaya ziine ebyashuri; kwonka Omwana w'omuntu taine na h'okuta omutwe.

yaabagira ati: Weena orikwakira omwana ogu omuto omu iziina ryangye, biri niinye ayakiire; kandi weena orikuunyakiira, biri ayakiire Owantumire; ahakuba omuto omuriimwe mwena, ogwo niwe mukuru.