Popular Bible Verses from Deuteronomy 30

Share

Akkupak aglaan uvva naliġaaksritkivsi iñuggunmik naakka tuqqunmik, God-miñ piḷḷuataunmik naakka piaġiirrunmik, akkupak ququaġikka qiḷaglu nunalu iḷisimarigisaqługik naliġaavsigñun. Iñuggun piksraqtaaġisiuŋ. Nakuaġisiuŋ Ataniq God-iksi, kamagilugu iḷumutuuġvigilugulu, iñuusaġataġumausi kiŋuniisiḷu nunannaktaaġiniaġniraani unniqsuqłiutigivlugu maŋŋuuvsiññun, Abraham-mun, Isaac-mun, Jacob-mullu.”

Kamagiguvsigiŋ piraksriutai Atanġum God-ivsi qaitchaġma ilivsigñun uvlupak, nakuaġiguvsiuŋ kamagisaġiksi, maliġilugit pitqurapayaaŋi, piḷḷuataġniaqtusi nunaqpaguġmiḷusi. Atanġum God-ivsi piḷḷuatausiġñiaġaasi nunannagiaġuvsi.

“Uvlupak uvva naliġaaksritkivsi nakuuruamik naakka pigiitchuamik, iñuggunmik naakka tuqqunmik.

Naumi, uvva nayuġisi. Iḷisimagisi suli taiguallagisi, aasii kamagisigiŋ.

Atanġum God-ivsi kiŋuvaasiḷu kamaksriḷḷasipkaġniaġaasi, nakuaġiyumiñaqsiḷuni iḷumupiaġataq, taimmaasii iñuusaġataġvigiaqsiḷugu nuna.

Atanġum piḷḷuataqtinniaġaasi supayaatigun miqłiqtuukkaqsiḷusi, pamiqsaagutaukkaqsiḷusi, nautchiaqaġvisiḷu iḷaŋaniñ nauriqpaglutiŋ. Ilaan quviallatigilusi piḷḷuataqtinniaġaasi maŋŋuuvsiksun quviallatigivlugich piḷḷuataqtinnamigi.

Aglaan kamaksriŋitkuvsi naalaġnisuŋaiġḷusiḷu, asiñuurraulusi nanġaigaqsiguvsi allanik god-inik, suksraunġiqsauniaqtusi. Kilikkivsi uvani akkupak. Iñuuvigivipasaġniaŋitkiksi nunannaktaaġiraqsi akianiittuaq Jordan-gum.

“Piraksriutitka uvlupak tainnatun siġġaġnaqtigiŋitchut ayuġnaŋitchullu.

Qiḷaŋmiutauŋitchut. Apiqsriraksraitchusi, ‘Kia papkua aiñiaqpagit atqautiyyaġlugit tusaalugit kamagiyumagivut?’

Taġium akianiinŋiñmiut. Apiqsriraksraiñmiusi. ‘Kia apkua aiñiaqpagit taġium akianiñ qaġġisuutiyyaġlugit, tusaalugit kamagiyumagivut?’