Popular Bible Verses from Juwão 14

Share

– Poropy'amopiryvypy katutà tè peneity aa, e'i. Nererovijai mãe kõ ãmẽ nokuwa'ãi poropy'amopiryvypya, e'i. Ije tè ãmẽ akuwa ãwĩvoa, e'i. Ajawyi tapejimopirai e'ã ikõ eoa rã rè nẽ. Tapekyje e'ã teve ikõ nẽ, e'i.

Ãmẽ Jesu e'i oreupe: – Papa rena rape vo mã'ẽ tè ije. Ajawyi ava mõ opota Papa rena kyty oo remẽ, tojirovija rã'ĩ ere. Ayvu aje ywete mã'ẽ mojenuarà tè ije. Ije kõrijõ tè poroerovãe kuwa Papa pyri tapeiko karuaru, e'i. Ava jẽ rõwã ovãe kuwa Papa pyri narovãei remẽ, e'i.

E'i jẽ Jesu oreupe: – Tapeãgyo e'ã ikõ ere nẽ. Tapejipy'amopirai e'ã ikõ erewarà mõ nẽ, e'i. [Kee tapejẽ e'ã ikõ ije nẽ: “Janereitytà oo”, tapejẽ e'ã, e'i.] Tapejirovija jẽ kõrijõ ikõ ere nẽ, e'i. Janejare'e rè ikõ tapejirovija jẽ teve nẽ, e'i.

Ajivy aa remẽ, Papa o'Ãg omuutà pepy'a pè penerekoarà rõmõ toiko. Eayvu rupi tè omuutà, e'i. A'e tè pemoja'arokatà pirujẽ eayvukwerà rè, tapeja'a jẽ ee, e'i.

– Ãmõ, kee a'e pejẽ. Eayvu rupi ekoi mãe kõ ojikuwa erauparà kõ rõmõ iko. A'evo mãe kõ Papa remiau rõmõtà tè ekoi. Eremiau rõmõtà teve ekoi kupa. Ajikuwaokatà ijupe kõ, e'i oreupe.

Papa kyty ajivy aa remẽ, aporegetatà ijupe peupewarà mõ, e'i. “Ne'Ãg emono ere ojirovija mãe kõ pè, erekoarà kõ rõmõ toiko”, a'età ijupe. “Hoõ” e'ità ãmẽ. O'Ãg tẽ tesõ omuutà pejẽ ãmẽ ky'y, awyje toiko pepyri ky'y. Aje ywete mã'ẽ Janejare'e rewarà omojikuwaoka peupe mã'ẽ a'e. Janejare'e noerovijai mãe kõ nomojimoenaoka'ãi kuwa i'Ãg opy'a pupe. Nomã'ẽ'ãi kuwa ee kupa. Nokuwa'ãi kuwa teve kupa. Pejẽ ãmẽ pekuwatà Janejare'e 'Ãg. Peneve ekoità, ajawyi. A'e pepy'a pupe ojimoenatà, e'i oreupe.

Peporanu ije ekoty rewarà kõ rõmõ remẽ, “hoõ” a'età pejẽ ãmẽ ipi. A'evo poroerekotà ãmẽ. A'evoa rupi Papa katuaya amojisaokatà pejẽ. Peporanu ije remẽ, “hoõ” a'età, ekoty rewarà kõ tè pejẽ rewarà mõ, e'i Jesu oreupe.

E'i Jesu oreupe: – Erauvay pekupa remẽ, eayvukwerà rupi peikotà ãmẽ, e'i.

Age'e ije ypy aatà penenone rupi Papa rena kyty, e'i. Penena rã mokatu aatà ajupa, e'i. Taa wasu tè Papa rena, e'i. A'e kyty aatà penena rã mokatu penenone. Nãwĩ vo'ãi sõ remẽ, na'e'ãi kuwa pejẽ, e'i.

Kãramõ amokatupa penena rã ky'y remẽ, ajo tarà mijẽ pepijarà mõ. Ãmẽ si peotà erupi ky'y. Maipe rupi aiko remẽ, pejẽ ve peikotà ereve ky'y, e'i.

Ajamã'ẽ Tome e'i ijupe: – Ãnĩ! e'i. Norokuwai maty põ neotà ajamã'ẽ, e'i. Manyvo noroereko'ãi Janejare'e rena rape orevote ikuwa? e'i ijupe.