Popular Bible Verses from KOLOSÉ 3

Share

Hun séé'-séé' éh pu'un tengéé' kenin ngan bakéh néh, jian réh pata pepika kepéh. Mai mihau penyala' néh lem kenin ko', pekua' Tuhan mega' penyala' lu'.

Jian kekat éh pengeloo' kenin keh pu'un tong seruga, mai keh ja'au kenin tong kekat éh tong tana'.

La'ah ineu'-ineu' éh naneu' keh, jian keh maneu' éh mu'un, pekua' barei' keh maneu' éh ngan Tuhan ngan bé' makat éh ngan kelunan awah.

La'ah ka'ah péh anah Allah, pu'un Iah pika keh ngan ngevéléé' keh dokoo' keh omok anah Néh mu'un. Uban kenat ka'ah tekep pika pepika, Jian tipan, diva' kenin, dawai kenin ngan kebit kenin.

Jian kekat tebaraa' Kristus dalem kekat kejian néh pu'un petem dalem kenin keh. Jian keh kua' petebaraa' ngan petesen siget-siget usah pah terah kekat pengejam keh. Jian keh nyanyi ha' nyanyi jin surat Masmur, nyanyi mejing Tuhan, ngan nyanyi éh ni'ai. Nyanyi mejing Tuhan Allah, bara' jian kenin keh ngan Néh. Kekat ineu'-ineu' éh naneu' keh Kenat péh éh nané keh, jian keh maneu' éh dalem ngaran Tuhan Yésus, ngan bara' jian kenin ngan Allah Tamen, tong ineu' éh naneu' Tuhan Yésus ngan keh.

La'ah pemung ngan kekat inah jian keh pepit penika keh kepéh, uban penika nah, inah jalan omok memikah keh pemung.

Ka'ah pu'un betéé' murip pemung ngan Kristus, jian keh pitah kekat éh pu'un tong seruga éh jalan Kristus menyun saa' na'au' Allah.

Jian pengepawah éh nena' Kristus nolong keh maneu' pemekat tong ineu'-ineu' éh tekep naneu' keh, uban Allah lepah tebai keh dokoo' keh murip jah awah dalem pengepawah Néh.

Uban néh kenat jian keh mematai kekat pengagat éh sa'at éh jin tana' iteu' éh pu'un lem kenin keh, barei' petuyang, kekat barék éh bé' tekep keh maneu', magat tong kelunan éh jah, merek, ngan magat juk alaa' mekum. Kelunan éh magat kenat inah éh pekua' kelunan éh pakai butun, uban kemagat néh, inah éh pengeja'au kenin néh.

Uban ka'ah lepah matai ngan urip keh pu'un éh pelim pemung ngan Kristus dalem Allah.

Bang hun iteu' jian keh bet kekat barék éh kenat, barei' merek, ngan mi'ah, ngan leko kelunan ngan ngesa'at ngaran réh. Mai lah keh pané maneu' kelunan ngan tosok tong éh bé' tekep.

Mai keh pané kenyo la'ah, uban pu'un keh lepah bet urip keh sahau pemung ngan kekat barék ngan penganeu' keh éh sa'at, ngan pu'un keh memakai urip éh maréng. Hun iteu' ka'ah pu'un maréng senuai Allah, Iah ngelayau ngepaléu keh maréng dokoo' keh omok murip barei' Iah. Inah jalan keh omok jam Allah mu'un.

O kekat lakei' éh pu'un redo, jian keh pika redo keh, mai keh sa'at adet ngan réh.

O kekat anak, jian keh ngelayau kivu sohoo' tinen tamen keh, uban kenat jalan éh ngepayoo' kenin Tuhan.

O kekat redo éh pu'un lakei', jian keh ngerera' tong lakei' keh, uban kenat éh tekep ngan kelunan éh ngelan tong Tuhan.