Popular Bible Verses from Lucas 23

Share

Ne zutun te kemulu zan pa idransang si Jesus, ne mid-ampù sikandin diyà te Megbevayà, ke sikandin te, “Amey ku, peseyluwa nu sikandan su wazè dan metueni ke hengkey heini is ed-ul-ulahan dan.” Ne zutun, haazà is midransang kandin, midripa zan ke hentei is ebpekeangken te menge ugelingen ni Jesus.

Ne migkag̵i si Jesus diyà te kandin te, “Benar heini is egkeg̵iyen ku kenikew he g̵untaan dà ebpezumehè ki zutun te inged te edtulusen.”

Ne zutun migkeg̵iyan din si Jesus te, “He Jesus, kenà a kenikew lipati zutun te kedhadì nu en keuzemà.”

Ne zutun ne migkulahì si Jesus is egkag̵i te, “Amà, ibpeg̵ewezan ku en kenikew is gimukud ku.” Ne iyan dà haazà ne naawà is gehinawa zin.

Ne nekeuma zan dutun te vuvungan he egngezanan te Tulan te Ulu ne zutun dan iransang si Jesus te krus ne inransang dan daan haazà is menge tulisan te zezuwa zaan he krus. Impasek dan is sevaha he krus diyà te egkekewanan ni Jesus, ne is sevaha, impasek dan diyà te egkeg̵ivang din.

Ne hein neudtu is andew zutun ne midtik-ew mebmerusirem is tivuuk he kelibutan seled te menge tetelu he uras. Ne zutun te iyan daan haazà he uras, kes utew mekepal he manggad he ingkurtina zuen te simbahan he Valey te Megbevayà, ne netik-ew mevindas diyà te liwezaan.

Ne zutun, sikan is kepitan te menge sundaru zutun, hein neehè din heini is neulaula ne nekezalig te Megbevayà, ke sikandin te, “Tutuu ves iyan he wazà mezaat he ulaula kayi he etew!”