Popular Bible Verses from Marcos 13

Share

Ne egkeepesan kew dut te langun ne menge etew su atag te keduma niyu kediey. Ugaid ke etew ne misan egkerasey sikandin ne kenà edsuwey dut te keduma rin kediey taman te ini pà sikandin te ampew te dunya, ne ebpekehaked te umur ne kenà edtaman.”

Uram kew ve ne penehana kew en, su warà niyu metueni ke hewii ne egkeuma ini.

Ne ketà te edsigkemen kew ne ebpeneheewiten kew riyà te kukuman, ne kenà kew meuru ke ebmemenuwen niyu se kedlalag niyu te kedtindeg te hinawa niyu su ketà ne iyan niyu rà egkekahi ne lalag ne ibpekahi keniyu su riyà ebpuun te Kedesenan ne Ebpetuntul te Menusiyà ne kenà kayi rà ebpuun te itungan niyu rà dè duen.

Su egkeawà ini se langit wey tanà, ugaid ne ini se migkahi ku ne kenà bulug ebperis.”

“Ugaid ne ini se idtarem ku keniyu,” ke si Hisus, “warà netau te hewii etawa endei egketahù ke andew ke edlived kayi ke Impeanak te Menusiyà su ke Amey ku rà ne Eleteala. Misan ke suluhuen te Eleteala diyà te langit wey misan dema siaken ke Anak te Eleteala ne warà netau ke keenu se kedlived din.

Ne embiya egkerineg niyu se ebpevunbunuey riyà te meriyù merani ne kenà kew meandek. Su ini pà iya se egkeuna ne egked-ulaula, ugaid ne warà pà meuma ke hewii te kebpupusa kayi te dunya.

“Ne sikiyu,” ke si Hisus “ne iring kew rut te tumetameng te eheran ne pekevantey kew su warà niyu metueni ke hewii te edlived din ini se kemuney te baley, ke embiya meapun be, ke edluuk be se kerukileman, ke ebpengelet en be ke manuk, etawa ve ke edsilà en ke andew. Tembù be uram kew, su embiya ebpeketekew ebpekeuma sikandin ne iyan din kemeyidan ne kenà kew nikandin egkeumaan se edlipereng. Ini se egkehiyen ku keniyu ne igkahi ku red dema diyà te langun ne menge etew te mebpekevantey ran te kedlived ku kayi.”

Su ebpemekebunuey pà ke idsenge inged, ne engketà ded dema ke idsenge retuan. Ne edlinug te mevaher te piya endei en, ne egetab se bitil. Ugaid ne rudsuan dà ini dut te keresayan ne egeramen niyu, iring dut te belilit te meritan ne ed-anak.

Su iyan pà ibpeuna ibpesabut ini se Meupiya ne Tudtul dut te langun ne menge etew kayi te ampew te dunya te kenà pà egkeuma ke hewii te kebpupusa kayi te dunya.

Su merakel se edlepew ne engkunkun te siaken en ne egkahi ran te, ‘Siaken en ini ke Impasad te Eleteala ne Ebperetuen te langun ne menge etew!’ Ne ketà,” ke si Hisus, “ne merakel ne menge etew se ebpekeperetiyaya te tarù dan.

“Ne sikiyu, ne ingat kew nevenar su ebpenigkemen kew te menge etew ne ibpepemenayik kew riyà te valey te kukuman. Ne ebpenruuhen kew riyà te valey ne ebpengedian te penduan te menge Hudiyanen, ne ebpeneheewiten kew riyà te menge egkeunutan wey harì te inged su atag dut te kedsarig niyu kediey, ugaid ne ini en imbe ke ralan te kebpekepesabut niyu kandan dut te Meupiya ne Tudtul mekeatag kediey.

Su ruen ebpenlepew ne menge etew ne engkunkun te sikandan ke Impasad te Eleteala ne Ebperetuen etawa sikandan ke ebpelambas te Lalag te Eleteala. Ne ebpekita dan te mekegeyip ne ed-ul-ulaan su apey ran perem meekali ayan se menge etew ne mibpemilì te Eleteala.

“Ne ebpeketundug be ketà te egkeipus ke hewii te kemeresayan,” ke si Hisus, “‘Ne ebmerusirem ke andew, ne kenà en edsilà ke vulan, ne ebpengeulug ke menge bituen diyà te langit, ne egkeparin dut te netehuan dan ke edtenuran ne menge bituen.’