Popular Bible Verses from Gũcookerithia Maathani 28

Share

“Na rĩĩrĩ, mũngĩathĩkĩra MWATHANI Ngai wanyu na mũhingagie mawatho moothe marĩa ndĩramwatha ũũmũũthĩ-rĩ, MWATHANI nĩarĩmũtũũgagĩria gũkĩra ndũũrĩrĩ iria ingĩ ciothe cia thĩ.

Mũngĩathĩkĩra MWATHANI Ngai wanyu, iraathimo ici ciothe irĩtuĩkaga cianyu

MWATHANI Ngai wanyu nĩarĩmũtuaga atongoria a ndũũrĩrĩ, nocio itirĩmũtongoragia; no kũgaacĩra mũrĩgaacagĩra mwatũũra mwathĩkagĩra maathani maake moothe marĩa ndamũhe ũũmũũthĩ.

Ningĩ MWATHANI nĩarĩmuuragĩria mbura ya kĩmera o kĩmera kuuma mũthiithũinĩ wake wa igũrũ ũrĩa aigaga mbura, na araathimage wĩra wa mooko maanyu. Nĩmũrĩkombithagia ndũũrĩrĩ nyingĩ, no inyuĩ mũtirĩkombaga kuuma kũrĩ cio.

“MWATHANI nĩarĩmũhootanagĩra harĩ thũ cianyu ciamũũkĩrĩra. Irĩmũtharĩkagĩra ciumĩĩte na mwena ũmwe, no ikamũũrĩra na mĩena yothe.

“MWATHANI nĩarĩraathimaga wĩra wa mooko maanyu, na aiyũragie makũmbĩ maanyu na irio. Ningĩ nĩarĩmũraathimaga mwĩ bũrũriinĩ ũcio ekũmũhe.

“MWATHANI nĩarĩmũraathimaga mũkiumagara na mũgĩcooka na mũciĩ.

“MWATHANI nĩarĩraathimaga matũũra maanyu o na mĩgũnda yanyu.

“MWATHANI nĩarĩmũraathimaga na ciana nyingĩ, magetha maingĩ, na ng'ombe na ng'ondu nyingĩ.

“Mũngĩtũũra mwathĩkagĩra MWATHANI Ngai wanyu, na mwĩkage ũrĩa wothe amwathĩĩte-rĩ, nĩarĩmũtuaga andũ aake kĩũmbe, o ta ũrĩa eeranĩire.

“MWATHANI nĩarĩraathimaga magetha maanyu na irio iria mũrĩrugaga.

Ningĩ MWATHANI nĩarĩmũraathimaga na ciana nyingĩ, ng'ombe nyingĩ, o na magetha maingĩ mwĩ bũrũriinĩ ũcio eerĩire maithe maanyu atĩ nĩakaamũhe.

Ndũũrĩrĩ ciothe cia thĩ nĩirĩonaga atĩ nĩmũtuĩtwo andũ a MWATHANI kĩũmbe, na nĩirĩmwĩtigagĩra.

Mũtikaanamakararie o na atĩa, kana mũthaathaiye, o na kana mũtungatĩre ngai ingĩ.

“No rĩĩrĩ, mũngĩaga gwathĩkĩra MWATHANI Ngai wanyu, na mwage kũrũmia maathani na mawatho maake moothe marĩa ndamũhe ũũmũũthĩ, maũndũ maya moothe mooru nĩmarĩmũkoragĩrĩra