Popular Bible Verses from Jesaja 60

Share

Reis deg, bli lys! For lyset ditt kjem, HERRENS herlegdom går opp over deg.

Folkeslag skal gå mot ditt lys, kongar gå mot din soloppgang.

Sjå, mørker dekkjer jorda, skodde dekkjer folka. Men over deg går HERREN opp, hans herlegdom viser seg over deg.

Den minste skal bli til tusen, den ringaste til eit mektig folkeslag. Eg er HERREN, når tida er inne, lèt eg det skje i hast.

Sola skal ikkje meir vera ditt lys om dagen, måneskinet skal ikkje lysa for deg, men HERREN skal vera ditt lys for evig, din Gud skal vera din herlegdom.

Sola di skal ikkje meir gå ned, månen din skal aldri minka. For HERREN skal vera ditt lys for evig. Sørgjedagane dine er til ende.

Då skal du sjå det og stråla, hjartet skal skjelva og svulma. For havsens skattar blir dine, rikdomen til folkeslaga kjem til deg.

Lyft auga, sjå deg ikring! Alle samlar seg og kjem til deg. Sønene dine kjem frå det fjerne, døtrene dine blir borne på armen.

I ditt folk skal alle vera rettferdige, dei skal eiga landet til evig tid. Dei er eit skot i min hage, som hendene mine har laga til mi ære.

Ingen skal høyra meir om vald i ditt land, om herjing og øydelegging innanfor dine grenser. Du skal kalla murane dine Frelse og portane dine Lovsong.

Portane dine skal alltid stå opne, korkje dag eller natt skal dei stengjast, så rikdomen til folkeslaga kan førast til deg og kongane deira førast fram.

Kamelar i mengd dekkjer deg, kamelfolar frå Midjan og Efa. Alle frå Saba kjem, gull og røykjelse har dei med seg, dei forkynner HERRENS pris.

Framande skal byggja opp murane dine, kongane deira skal tena deg. I min harme har eg slege deg, men i min nåde miskunnar eg deg.

Før var du forlaten og forakta, og ingen besøkte deg, men no gjer eg deg stor for alltid, til glede frå slekt til slekt.

Du skal få suga mjølk frå folkeslaga, av kongars bryst skal du suga. Du skal kjenna at eg er HERREN, din frelsar, Jakobs Mektige som løyser deg ut.