Popular Bible Verses from Cenisihs 8

Share

KaaTipenciketc tahsh ekii minaantank i'i pakitinaahsowin, wiinke kii⁠minwentam. Miitahsh kaa'itisotc, “Kaawiin miinawaa wiihkaa ninka macakintansiin o'o ahki, aanawiin inini ahpaniko eh⁠pi oshkaatisitc e⁠onci maci'inentank ote'ink. Kaawiin wiihkaa miinawaa ninka nihshiwanaacihtoohsiin pimaatisiwin o'o kaakii ishihcikeyaan. Minihk itahsh ke⁠ahkiiwank, ta⁠kihtikenaaniwan, ta⁠moona'ikenaaniwan kaye. Ta⁠kihsinaa, ta⁠kishite, ta⁠pipoon, ta⁠niipin kaye, kaa⁠kiishikahk, kaa⁠tipihkahk kaye kaawiin wiihkaa ta⁠poonihsehsinoonan.”

Noowa (Noah) tahsh okii onaapihkinaan waah⁠tashi pakitinaahsoohtamawaatc kaaTipencikenitc. Okiih kakiikinaa' kahkina peyehkisinitc aya'aawihsha', pinehshiinsha' kaye, ekiih caakisamawaatc kaaTipencikenitc kiki misiwe aya'aawihsha' ekiih ishi pakitinaahsoohtamawaatc i'imaa kaakii ishi onaapihkiniketc.

Kishemanitoo okii maamihkawinotawaan Noowawan (Noah) i'i kaye kahkina aya'aawihsha' kaakii wiici poosiimikonitc i'imaa kihci ciimaanink. Kishemanitoo tahsh kii‑ishihcike ci⁠kihci nootininik o'omaa ahkiink, miitahsh kaa⁠ishi maacii iskahtenik.

E⁠ani onaakohshininik tahsh okiih pikiiwe naasihkaakoon omiimiin ekiih tahkwantaminitc oshki aalip tinowipak payesh iko ekii manipitoonitc. Miitahsh Noowa kaakii onci kihkentank aasha nipi ekii ani iskahtenink.