To bairo cʉ̃ ca-ĩiro:
—Ananía, ¿nope ĩi Sataná mʉre cʉ̃ ca-wadajãrijere mʉ apiʉjarí? Dio Espíritu Santopʉre jocʉna cʉ̃ mʉ ĩitowʉ, “Yʉ ya yepa yʉ ca-nunie yepa wapa niyeru nipetirona yʉ joo,” ĩitoʉ, cʉ̃ ca-ĩiñupʉ Pedro. —Mʉ niyerure apeye mʉ cũucõaricʉ, mʉ majuuna yajioropʉ cʉgogʉ. Ti yepa aperãre mʉ ca-nuniparo jʉgoye mʉ ye jeto ca-añupa. To bairi na mʉ ca-nuniro bero mʉre na ca-wapayerique niyeru mʉ ye riape noo mʉ ca-booro cá-átipe anibajupa. ¿Nope ĩi mʉ yeripʉ, “ ‘Atie yʉ niyeru nipetirona mʉjaare yʉ joo,’ na yʉ ĩitogʉ,” mʉ ĩi tʉgooñarí? cʉ̃ ca-ĩiñupʉ Pedro. —Jã jetore ĩitoʉ mee mʉ ĩi. “Atie to cõona yʉre na ca-wapayerique ãa,” ĩitoʉ Diopʉre cʉ̃ ĩitoʉ mʉ ĩi, cʉ̃ ca-ĩiñupʉ Pedro.
To bairo cʉ̃ ca-ĩiro apii Ananía nemoopʉre ria ñaa, ca-bai yajicoajupʉ. To bairo cʉ̃ ca-bai yajirijere apirã camaja nipetirã ca-uwiyuparã.