Popular Bible Verses from Maki 13

Share

To asaga bona'magi nani kumu lite enipagu sibina nohinogo sipi ka lepekilabe. Ya hi lepalanaya aku'i nanitoga kosele'i mehose ule'ale huto minalina bomofi, kana'a su holenogo, Hu'mau le'malina'mu yabe. Yesu ya luto lu epi'ehibe.

To ya huto ni'inaya, lenali bu gete minalo. To lenegekesa keheli bati hite minalo. Ana kana huto hilina'a lenali ana hite menekehelibe. Ya hu'ehinagi be go bati hite minalo.

To enali naga'i lepite lenele'mete bite ka foya li lepalana yupahi lenali koli mehilo. To kaga lilana ka lenegekesa keheli keheli hite meminalo. Hena'mube? Hu'mau, ana kanagu lenehe'menogo kaga lilabe. Ai lu lepilina ka ya'ma lu epilo. Lenaligo kaga lilana meni'ibe. Sikalafu'uba lenali hiti moneka nehite fatehatinimagihi kaga li epilabe.

Kokuluma hiti me'i hiti alihi fenene huto su halina'mu yabe. To nani ka'ni lusiga yagi mefilise huto hilina'mu yabe. Yesu ya luto lu epi'ehibe.

To Yesu mone ka hiti ma luto lu epi'ehina: Ya'ma huto hilina kana asaga bona'magi menekehelibe. Kokulumaga agelomagi enali hiti menekehelibe. To nani Hu'mamofihi pana'amofita menokehelube. Afo'nifu, Hu'mau ai'asigoko keheli'ehina yabe.

To alihi kanagu hiti, noto noto hepatoga luba hilenogo to luba ka nelinogo lenali kehelite koli mehilo. Ya'ma ma'naka luto huto hilina'mu yabe. To ya'ma kana huto nohinogo me'i su halina kana huto hilube'mu menohibe.

Hepa afo'afu hiya kanagu alibe lite lenali menekehelibe. Utehi alifi, folugu'i alifi, kokole nogo nomelenogo alifi, go'i nolinogo alifi, ya'ma menekehelibe. To lenubu'i ke'ehinogo ai mele'isi noenogomo henatini hilabe? To ya higo bu gefe lite minalo. Nani ya'ma lu nolepuna ka asaga bona'magihi ana huto lu noepube. Bu go bati hite kaba hite minalo.

Yata'a fato fato naga'magi fato fato naga'i hiti luba hilabe. To mone gihiti bomofihi naga'amagi ho tite mone fato kibinamofihi naga'a hiti luba hilabe. To fato fato hepatoga imima'i lilibe. To fato fato hepatoga nose'na fenene hinogo sipi kau'na enahalina'mu yabe. To ya'mana asaga'i huto hulenogo, lenali ma lite kehelilabe. Luna lana keta hina nasana asaga'i gofana hilina kana yuhufasi hapi filube'mu nohibe lite kehelilabe.

Yata'a kohe toto lenali nani'ni hetofa ka lamana'ni asaga noto noto kapogu lu yege hete lu epinogo yalo alihi me'i asaga baga ito su halina kana huto hilibe.

Ya'ma alihi kanagu fato fato bona'magi babu lite lenalitoga melugu huto hilete ete to faga lite nani nigi'ni hete: Nani Mesia bo nohube, lenubuto bise linogofi, nani Mesia bo lenehe'mose nohube linogo, ya hite faga lite lu epite'ani yalo babu bona'magihi enele'mo keheli fetaga hilana'mu yabe. Lenali ya'mu kaba hi bati hilo. Bo moneubafi moneuba lenimi'i molo lalibe, luto nolube.

To ya'ma huto nohinogo lenalitini kaba hi bati hilo. Boana'magi alihi lenali'i kefefe hite bite mono nonugu lenele'mete bite ka foya lilete osahi lepilabe. Nani kumu lite lenele'mete bite gamani bona enubulo to enikibina bona enubulo lenele'mete bite ka foya li lepalalabe. To ya hinogo lenali nani kumu ka lamana'a lu epilabe.

Akili ka lilabe. To ana kanagu faga faga kaga lu huto huto bomagi hiti to faga mono ka luse bomagi hiti ma lite lilabe: Nani Mesia bo yabe, lite faga lite lilabe. To enali fato fato suhi hite topa hese suhi hite hilete ya'ma Hu'mau enele'mo'ehina bona'magihi keheli sibina hu epalalune lite babeyafa hite enimi'i malalana'mu yabe.

To Yesu mone ka hiti ma luto lu epi'ehina: To ya'ma gumi'i gofana huto tilina kana su holenogo yege fenene higo sinihi gilibe. To ikahi hiti besa besa meloto li sabalibe. To kokulumaguti sonofi'i yege yege'na limilibe. To kokulumagu nasana asaga'i li gusili gusili hilina'mu yabe.