San Mateo 8
8
Jesús miliyak tu men nizak yalyizh kwa'n lë lepra
(Mr. 1:40-45; Lc. 5:12-16)
1No or ñala Jesús yek lom ze', nayax dox men nzadkë tich Me, 2lë'chi nguzubi tu miyi' lo Jesús, tuli ngo't kuslo xa' lo Me; no miyi' re' nizak tu yalyizh kwa'n lë lepra, orze' nzhab xa' lo Jesús:
―Lë' go, chi lë'o nzhaklai, gak liyak go da.
3Orze' mitsiga' Jesús ya', no migal Me yek miyi' re', nzhab Me:
―Nzhaklan niwenal.
Orze' lwega' miak xa' re', no mimbe xa', 4orze' nzhab Jesús:
―Wi'le, nadi'zhtle lo men, maska wa lo ngulëi' par rël xa' lu, no biza' gon nela xa nzobni' lo ley che'n Muisés par ne xa', lë'l uniwen la.
Jesús miliyak mos che'n tu xa' nzë Roma
(Lc. 7:1-10)
5No or nguio Jesús yezh Capernaúm, nguzubi tu capitán xa' nzë Roma lo Me, dox nalats mile' xa', nguna'b xa' lo Jesús, 6nzhab xa':
―Lë' go, kinun tu mos da, nax nzhakne, nagakt win xa', no dox yalne kinu xa'.
7Orze' nzhab Jesús:
―Lë'da yal, liyaka xa'.
8Orze' nzhab capitán ze':
―Lë' go, gat ñalt da yi'd go lizha; namás bile' go mandad por xti'zh go, lë' mos da niwen, 9porke kinun más rë xa' nile' mandad lon, no nu ska da kinu rë sondad xa' nile' kwa'n nzhapa; chi gapa lo tu xa': “Wa”, lë' xa' ya; no chi gapa lo xtu xa': “Dë'”, no lë' xa' yë'd; no or gapa lo tu mos da: “Bile' kure'”, no lë' xa' le'i.
10Or mbin Jesús kure', xe miwi' Me, orze' nzhab Me lo rë xa' nzhakë tich Me:
―Walika kwa'n nin lo go; per ni xid rë men Israel gat nen tu xa' ñila xti'zha nela miyi' re', 11no nin lo go, nayax men yi'd nez plo nilen ngubizh, no nez plo ña'z ngubizh, par gao bixa' lo mes kun Abraham no kun Isaac, mbaino kun Jakob plo nile' Dios mandad, 12per rë men Israel xa' gat nzhont widi'zh che'n Dios, lë' Dios xë'l bixa' plo nakao no plo go'n bixa' lo yalne, haxta kwezh lëi bixa'.
13Orze' nzhab Jesús lo capitán ze':
―Bizë lizhal; sa' gake nela xmod ngwayilal da.
No mis orze', tuli miak mos che'n capitán ze'.
Miliyak Jesús xna'zha'p Per
(Mr. 1:29-31; Lc. 4:38-39)
14No or mizhin Jesús lizh Per, une Me, lë' xna'zha'p Per nax lo lo'n, nizak xlë', 15no migal tsa Jesús ya' xa' una' re', tuli nguro' xlë' xa', no ngwaxche xa', orze' miza' una' re' kwa'n ndao Jesús.
Miliyak Jesús nayax men nzhakne
(Mr. 1:32-34; Lc. 4:40-41)
16No or nzhazhëlalyuo, nzhanu men nayax xa' nzho mbi mal laxto', lo Jesús; no kun widi'zh che'n Jesús namás, mile' Me mandad nguro' rë mbi mal laxto' rë men ze'; no nu miliyak Jesús rë nak rë xa' nzhakne nzhin ze'. 17Rë kure' ngok par mizhin rë kwa'n midi'zh Isaías, tu xa' midi'zh por Dios nzhala, or nzhab xa': “Lë' xa' re' mbi'y yalyizh che'n be, no ñanu xa' yalne che'n be.”
Kwan naki'n le' men par yakë men tich Jesús
(Lc. 9:57-62)
18No or une Jesús, nayax men nzhin naka'n plo nzo Me, orze' mile' Me mandad, ded Me kun rë men che'n Me xtu ro' lagún, 19no ze' nguzubi tu maestr lo Jesús, tu xa' nilu' ley kwa'n mila' Dios lo Muisés, no nzhab xa':
―Maestr, nzhaklan yi'd kë'n tich go rë plo ya go.
20Orze' nzhab Jesús:
―Rë mbëëz kinu lizh, no rë miyin kinu yo che'n, per Xga'n Dios Me nu nak tu men yizhyuo, gat kinut ni plo ga'.
21Orze' nzhab xtu men che'n Jesús:
―Gulëz go, galo laka nzhakacha xuza, orze' yi'dkë'n tich go.
22Per nzhab Jesús:
―Tuli di'kë ticha, bila' ka'ch rë men, xa' nak nela men ngut ba', tsa' men ngut bixa'.
Mikwë'z Jesús tu yiubi nazhe'b le'n nits
(Mr. 4:35-41; Lc. 8:22-25)
23No or nkë Jesús le'n tu bark, rë men che'n Me nzha kun lë' Me. 24No or nzha la bixa' garol sao' nits, lë'chi nguro' tu yiubi nazhe'b le'n nits, no kun rë bol che'n nits, nila' yitlo bark le'ne, per lë' Jesús naxnaa, 25orze' ngwalixche men che'n Me Me, nzhab bixa':
―¡Lë'o, nala't go ya'zyuo' no le'n nits!
26Orze' nzhab Jesús:
―¿Chon dox nizheb go? Kuba' nak por gat ñila go Dios be's.
Or midi'zh Me kure', ngwatsuli Me no mile' Me mandad par kwëz yiubi no nits, orze' rëi mia'n xe, 27orze' xe mia'n rë men che'n Me, no nzhab bixa' lo wech bixa':
―¿Plo nzë xa' re' se? ¡Haxta yiubi no nits nzhon ro' xa'!
Chop men yezh Gadara xa' dox nzho mbi mal laxto'
(Mr. 5:1-20; Lc. 8:26-39)
28No or mizhin Jesús xtu ro' lagún, plo ña'n lazh men Gadara, ze' mizhë'l Jesús chop xa' nzho dox mbi mal laxto'; nguro' bixa' le'n panteón, no dox nayi'lazh bixa', kuze' ni tu men gat nidedt ze', 29lë'chi nguruzhië bixa', nzhab bixa':
―¿Kwan nzhaklal linul no, Jesús Xga'n Dios? ¿Chi nzë'l par zakzil no dub naga gal zhë or gab Dios xmod gak kun no?
30No gax laka ze' nzhin tu bëd kuch kiyao; 31nalats midi'zh rë mbi kwa'n nzho laxto' rop rë men re' lo Jesús, nzhabe:
―Chi lë'l kutin no laxto' rë xa' re', neka bila' bi no laxto' rë kuch ba'.
32Orze' nzhab Jesús:
―¡Bizë go!
Or nguro' rë mbi mal ze' laxto' rop miyi' ze', par ñai le'n rë kuch ze', lë'chi ñaoxo'n rë ma, no ngula bima ro' tu bilë' plo nak ro' nits, ze' ngwap bima, 33no or une rë xa' kikina rë kuch ze' kure', mikë' bixa' karre, ña bixa'; no or mizhin bixa' yezh plo nzho bixa', midi'zh bixa' rë nak kwa'n une bixa', no xmod ngulo' Jesús rë mbi mal kwa'n nguio laxto' rop men ze', 34lë'chi rë nak men yezh ze' nguro' bixa' par nzhatsi' bixa' plo nzo Jesús; no or mizhin bixa' plo nzo Me, orze' mina'b bixa' ro' Jesús ze'.
Избрани в момента:
San Mateo 8: zca
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2013, Wycliffe Bible Translators, Inc. All rights reserved.