Salmos 6
6
Salmo 6
Sukan kakan‑ta'vi o nuu Su'si ma ja na kunda'vi ini ña'a ya ora kénda in tnundo'o tnuneni nuu o ma
1Iya Tátnuni, máko ndonda tna ni nuu sa ora ndákiti ini ni ma,
te máko xndo'o xneni ña'a ni ora ndákiti xeen ini ni ma.
2Kunda'vi ini ña'a ni saña, vi Iya Tátnuni, te ndasava'a ña'a ni,
vaa onde yikikuñu sa a ni kuita kuiti
kuenda tnu'u ja kûu sa kúni sa.
3Te ní'i ní'i‑nka sa, vaa yu'u sa.
Te ndijin Iya Tátnuni, ¿na kivi sana kii ni ja chindee ña'a ni?
4Ne'e ni, vi Iya Tátnuni, te ndasava'a ña'a ni,
te kaku sa ja ma kûu sa te skenaa sa maa sa,
vaa jâ ni skuiso ni ja kúnda'vi ini ña'a ni.
5Vaa ñayii jâ ni ji'i ma chi masu kuu ndachiñu'u‑ka ña'a i,
vaa nú onde andeya ma ñunee i ma,
te masu kuu ndaka'an‑ka ña'a i.
6Vaa jâ ni kuita sa ja tnána u'vi sa a.
Ndaka jakuaa ma nda'yu nda'yu sa,
te ni ndoyo kuiti‑nka nuu kátuu sa ma, sa'a ndute nuu sa a.
7Te ni kuita nduchinuu sa ya, te ñatuu ka kundijin‑ka,
kuechi ja nda'yu nda'yu sa ma
ja kuechi ja ka sa'a ndeva'a ña'a ñayii
ñatuu nde ka kunimani nuu sa ma.
8Ndaka ni ja ka sa'a ni ja u'vi a, kuán jin ndiyo ni.
Máko jin koo‑ka ni nuu iyo sa ya,
vaa Iya Tátnuni ma chi ni jiniso'o ya ja nda'yu sa a.
9Te Iya Tátnuni ma chi ni jiniso'o ya ja jikan‑ta'vi sa ma,
te ni jan‑ta'vi ya ja jiña'a sa ma.
10Ndaka ñayii ñatuu ka kunimani nuu sa ma,
jin ndanda'yu xen‑xeen maa i,
te sanaa sanaa‑ni, te jin ndatna'a maa i ja kan‑nuu ma,
te jin ndakakayata i jin koo i.
Избрани в момента:
Salmos 6: xtm
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2013, Wycliffe Bible Translators, Inc. All rights reserved.