San Mateo 3
3
Waa nu briib nis mbecy pshaal yu riidz ni Ñgyoozh tub lugaar uz zi
1Tiem zeꞌ bri Waa nu briib nis mbecy tub lugaar ub zi lo yu ni Judea. Orzeꞌ brugyiꞌ rshaal yu riidz nu bruu lo Ñgyoozh. 2Orzeꞌ nay:
―Mneꞌ der dela cyi nu ricy ru gun sñuu ga cyid gyel gubier ni Ñgyoozh ―nay.
3Gun Isaías, yu nu mnii por cuen ni Ñgyoozh, laab Waa bzat yu ornu nay:
Zaab tiꞌ tub mbecy.
Rbish tiy tub lugaar ub zi.
Orzeꞌ nay:
“Nañ lardoo den nañ gal nu na tub nez.
Orzeꞌ bicy nap der nez zeꞌ par ornu cyid Shuaan den.
Pshaal der tub nez nu li par nu ded mi”,
na Isaías, nay.
4Shab Waa, ndeꞌ byaañ nu gyich camey. Zeꞌ nañ yu ri tub sinch gyid. Coz nu bdow yu, ndeꞌ gushagy nu dziñ doo ni bez gyish. 5De mbecy nu yuꞌ Jerusaleeng, nu de mbecy nu yuꞌ lo de yu nu la Judea, nu de mbecy nu yuꞌ gaab ga ruꞌ gyoow Jordaang, za dey nu zuub gyidag yu coz nu rnii Waa. 6Na ornu blazh pshuub ruꞌ dey dela cyiy, orzeꞌ Waa briic yu nu wi nis dey gyoow Jordaang.
7Tees ornu bzaac Waa nu dzi zigy de mbecy fariseo gal nu mbecy saduceo bruꞌña dey par nu cuic yu nu zu nis dey, orzeꞌ nay:
―De ru mbecy shiñ ricy, ¿cyu mnii lo der nu gac gla der lo cashtig ily ni Ñgyoozh nu bi yad gaab ñi? 8Bicy der tub mod nu nap gabe nu bi mneꞌ der cyir. 9Cueꞌ gnii too der nu glar ni de cashtig zeꞌ nu nac nu rnii der: “Nac naa nez gyitoo bel nin Abraham”, rniir, gun rishli Ñgyoozh gac gyash mi gashtal de gyitaꞌ ii nu gyicy mi nu gyac ñi nez Abraham. 10Gun cashtig ni Ñgyoozh nañ gal na tub gyibag. Bi zu lily laañ par nu shiꞌñ ñi dela yag gashtal lyu lañ. Dela yag nu wacuic uugy nap, gyiꞌñ ñi nunu chañ lo gyi.
11’Ya̱ nu rishli drica̱ nu zu nis der nu nis par nu gabe nu bi mneꞌ der cyir, tees biñ nu cyid par lo̱, mi zeꞌ cuic mi Espiriit Yon ni Ñgyoozh ni mbecy, nunu cuic mi tub cashtig nu nañ gal nu na gyi. Mi zeꞌ gya zir zum par ya̱. Ya̱ rila wangyapa̱ du̱ ni gyid lab mi. 12Mi zeꞌ nam gal nu na tub mbecy nu bi zu lily nu tub ya ruꞌ biiz par nu com dela mbigy trig, nunu gyicy tublaazh mi ñii par nu cuꞌ choow mi ñii nañ ye. Zeꞌ de gyid ich ñi zeed mi ñii chañ lo tub gyi nu rila wayu ―na Waa.
Jesuuz winis mi
13Tiem zeꞌ Jesuuz bruum Galilea zam gashtal ruꞌ gyoow Jordaang. Orzeꞌ bruꞌñam lugaar zeꞌ nu ri Waa gun orzeꞌ cuic yu nu zu nis mi. 14Nu loga la “Cueꞌ”, na Waa rab yum. Orzeꞌ nay:
―Ya̱ rlagy ñi nu cuic ru nu zu nisa̱. Zeꞌ ii ca ru yad ru lo̱ ―nay.
15Orzeꞌ na Jesuuz rab mi yu:
―Bzaan la nu ni gac ñii na, gun rlagy ñi nu gyicy yac den nu de coz nu rlagy Ñgyoozh ―nam.
Orzeꞌ Waa pshet ic yu. 16Cuanzir nu wi nis Jesuuz, orzeꞌ bruum lo nis. Orzeꞌ sij la byaal gyibaa. Orzeꞌ Jesuuz bzaac mi Espiriit Yon ni Ñgyoozh nu bet mi. Bet mi gal nu yet tub begy gusub mi toom. 17Orzeꞌ zaab tiꞌ nu rnii gashtal gyibaa. Orzeꞌ nam:
―Mi ii iꞌña̱, biñ nu tonaꞌ la rca̱ nunu tonaꞌ la yet lagya̱ ―nam gal baa.
Избрани в момента:
San Mateo 3: zpz
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2004, Wycliffe Bible Translators, Inc. All rights reserved.