Génesis 16
16
Agar nina uchiri Ismaeljai pachisa timau
1Abraman nuwe Sarai uchin jurechu ajakuiti. Turasha egiptonmaya nuwa nina inatairi Agar naartin pujujakuiti. 2-3Tuma asamtai Sarai Abraman chicharuk: Yuus winaka uchin jurechu amajtusuiti. Turuta asamtai wina inatair nuatkam uchi akigta, turawakmin uchika winau arti, tusa tinaiti. Tinu asa, Canaán nugkanam diez uwí pujusar, Sarai Agar nuatkata tusa Abraman susauwaiti. 4Turam Abram Agaran ajaprumtikauwaiti. Turasha Agarka ajamtin nekama Sarain wishiku. 5Turam Sarai Abraman chicharuk: Wii amina nuwan amasmaj nu ajapruk ni ima nagkamaku enentaimtumak wina wishikrawai. Tuma asamtai iturchatcha yainig a nunaka Yuus nekawai, tusa tinaiti.
6Tama Abram ayak: Ame inatairmeka aminuk asamtai, ame wakeramu turata, tusa tinaiti. Tama Sarai nina inatairin pegkerchau amaju. Turam Agarka jinki wuwaiti. 7Tuma Agarka shuar atsamunam entsa nugkanmaya jiinmaunam jeaa nugkani wajaun, nayaimpinmaya shuar wainkauwaiti. 8Tura iniak: Agara, Sarai inatairiya ¿tuiya winam tura tui weame? tusa tinaiti. Tama chichaak: Wii takarnaitaj nu nakitrurmatai weakun juniajai, tusa tinaiti. 9Takai nayaimpinmaya shuar chicharuk: Ame takartairmin Sarain waketkim nigki umirkata, tusa tinaiti. 10Nuiyasha nayaimpinmaya shuar Yuus akupkamu chicharuk: Amee weantu ainan nekapmamainchau napamturtatjame tusa tinaiti.
11Yuus akupkamu nayaimpinmaya nuiyasha chichaak: Ame waitamun Yuus nekartama asamtai, uchi aishmag jurertatme, nuna naarigka Ismael anaikata. 12Nu uchika kajen tsakar, chikich shuar ainajaisha maanin atinaiti. Tura chikich shuar ainasha nijai maanin artinaiti, tusa tinaiti. 13Nayaimpinmaya shuarjai Agar chichasu asa, “Yuus wainmauwa nuwaitme”. Yuus wina waitkau aig, wika iwáku pujajai tusa tinaiti. 14Tuma asamtai entsa yumirmatai naarincha, Tuke Puju, tura Wina Kuitamrin tu anaikauwaiti. Nu entsaka Cádes, tura Béredtan ajapeentrin ajakuiti. 15Agar uchi aishmagkun Abramnaun jurer Ismael anaikauwaiti. 16Abram ochenta y seis uwí ejé pujai Ismael akinawaiti.
Избрани в момента:
Génesis 16: hubDBL
Маркирай стих
Споделяне
Копиране
Искате ли вашите акценти да бъдат запазени на всички ваши устройства? Регистрирайте се или влезте
© 2010, Wycliffe Bible Translators, Inc. All rights reserved.